「渣男」賴Sir(歐瑞偉飾)一直利用保安公司行政部經理娜姐(楊卓娜飾)對其傾慕之情攞著數,至噚晚(13日)嗰集《有種好男人》,賴Sir終被揭發搭上娜姐下屬Macy(張詩欣飾),「個心穿咗個窿」嘅娜姐瞬間崩潰,坐喺馬路上放聲痛哭,我見猶憐。
此時夏中秋(徐榮飾)化身「暖男」給予安慰,不甘輸畀「後生女」,娜姐向對方大吐苦水:「我為佢付出咗咁多,但到頭來乜都冇,真係好唔甘心。」
夏中秋隨即大拋警世金句「唔放手咪仲嘥時間」、「腦明白係一回事,個心接受係另一回事」、「最緊要做咗啱嘅決定,其他嘅嘢交畀時間啦」,落力哄女方開心,更為對方出頭寸爆賴Sir,最後成功將娜姐「私有化」。
劇中情路崎嶇,但現實中楊卓娜卻係一名「幸福繼母」,佢與「廣告燈箱大王」楊志翹相愛十幾年,人前人後依舊恩愛甜蜜。楊卓娜受訪時稱未遇過「渣男」,但坦言自己過去跟「娜姐」一樣執著,以前為堅持而堅持,所以佢好認同「唔放手咪仲嘥時間」,講到拍攝淚崩街頭呢幕,楊卓娜認為最困難係著高踭鞋行斜路,亦未試過喺條街放聲大哭,感到好尷尬,但咁樣做任性得嚟又好過癮,令情緒宣洩。
另邊廂,田中直男(黎學勤Jeffery飾)自我介紹為大企業後代,惟飛雲(陳自瑤Yoyo飾)先後撞破田中換上工作服維修大廈及當外賣車手,令田中身份相當有可疑,當中最搞笑一幕,係廣東話得半桶水嘅田中把「A貨」理解為「Ichiban(指一流)」,其間鬧出唔少笑料。
提到首次跟Jeffery合作,Yoyo坦言與私下唔相熟嘅演員扮情侶,拍攝初頭需要慢慢摸索,並大爆對方一拍親熱戲即怕醜,Jeffery有面紅尷尬,多數係Yoyo主動撩佢傾偈同講笑,去舒緩對方情緒令Jeffery放鬆啲,盡量熟絡啲就冇咁尷尬;劇中飛雲疑似遇上靚仔富二代,問現實中靚仔同有米會咩抉擇?Yoyo打趣道:「當然係靚仔又有米啦,但其實都幾難,因為人永遠冇完美嘅,不過我覺得最緊要係專一。」
《有種好男人》逢周一至周五晚8點半翡翠台播映