「唱作王子」馮允謙（Jay Fung）即將3月首踏紅館，舉行《JAYPOP LIVE@COLISEUM 馮允謙演唱會 2023》，優先訂票經已火速售罄，其餘門票已定於1月16日公開發售，出道一年即推出首張個人專輯嘅小師妹雲浩影（Cloud）亦憑實力勇奪《叱咤樂壇流行榜頒獎典禮2022》生力軍女歌手金獎。
為見證兩位重要時刻，二人於1月15號舉行簽唱會，同場並宣佈好消息，香港唱片商會過去一周唱片銷量榜中，Jay專輯《LOVE & LOSS》 登上冠軍，而小師妹 Cloud首張個人專輯 《THE CLOUD》位於亞軍，可喜可賀。
Jay及Cloud簽唱會吸引大批粉絲到場支持，企滿商場多層，非常熱鬧，Cloud表示呢個係佢出道後首個唱片簽唱會，心情興奮。活動上Jay獻唱《Freakin' Nightmare》及《Me and the Moon》，Cloud獻唱《氣流》和《願望之翼》，佢哋更與fans玩寫揮春遊戲，Cloud寫上「利是𢭃來」送畀Jay，佢解釋剛入行時𢭃到對方嘅開工利是印象深刻，Jay則以英文拼音寫上「衝上雲霄」回禮，不過Cloud睇唔明白，要Jay逐個字解構，場面非常搞笑。
Jay將於三月舉行首個紅館個人演唱會，早前優先訂購門票反應熱烈，佢希望能夠再次加場，對於門票銷情，Jay坦言心情緊張：「之前優先訂飛已經緊張到失眠，公售前要飲茶紓壓。（開騷會否除衫騷肌？）哈哈，我唔係偶像唔使騷肌，但會試吓跳舞。（辣身舞？）任何舞都會考慮。」
