Chantel繼往年之後，兔年來臨之際再度拍攝電子利是廣告，仲同新拍檔 JNYBeatz 合作演出，又有新合唱歌，喺廣告又唱又跳，帶動新年嘅歡樂氣氛。而 Chantel 今次仲化身小師姐，同首次拍廣告嘅JNY一次出鏡，難怪對方話感覺興奮又新鮮喇。

防疫措施放寬之後，唔少人都打算外遊過新年，而JNY就話會留港同家人度過，因為過往幾年都缺少拜年嘅重要時光，所以今年就要「狂派」喇。

而Chantel聽到已經身為爸爸輩嘅JNY咁講，亦都大賣口乖，話收到電子利是會一樣開心咁話呀。唔少藝人都會為咗意頭派開工利是，而Chantel原來舊年起已經開始，不過就以自製曲奇餅代替錢喇。

當年只得6歲已經因為拍攝廣告而備受注目嘅日本女星 八木莉可子 ，多年來都喺唔同廣告商之間大受歡迎，呢日佢就同 賀來賢人 拍攝新廣告，睇佢嘅造型打扮已經夠晒有趣喇，扮演外星人嘅佢喺廣告中仲嚇親拍檔呀。

雖然佢本人都覺得呢次造型夠晒突出，不過拍攝時就因為高度僭建嘅髮型而要非常小心喇。突然被外星人嚇醒嘅賀來賢人，仲提到如果有機會，自己想去夏威夷賣班戟，因為貪當地可以隨意去滑浪咁話。而八木莉可子就希望可以喺書店工作，因為可以沉浸喺書海當中呀。