巨星周潤發一向幽默風趣，原來佢除咗留意演藝界嘅後輩，發哥都有睇東京2020奧運會金牌得主張家朗打比賽嘅表現，呢日二人首次對話，發哥再次大放笑彈，稱好開心見到自己偶像，介紹怕醜嘅張家朗進場。
身高185嘅發哥，面對193身高嘅張家朗，連發哥都向抬頭向高望，發哥笑說：「我好少望人要咁樣望，喂！點呀！好唔憤氣，有人竟然高過我。」
發哥指第一次見張家朗本人，比想像中靚仔、高大、溫文有禮，而喺螢幕就係留意張家朗於東京2020奧運會打金牌一戰，感覺佢好有型，最難忘係張家朗花劍「倒劍」嗰一吓，動作好瀟灑。
發哥稱呢個係世界大賽，佢表現好冷靜，之後發哥再睇佢以前打世青賽，有次見張家朗拎冠軍好激動，反而喺奧運嗰場，張家朗好冷靜，發哥看到張家朗成長咗，整個人轉變好大，發哥表示：「我對花劍唔係好熟識，不過見佢打就好瀟灑同好靚，我將有衝動想學花劍。」發哥示範最鍾意張家朗那一招。
張家朗初次見發哥有啲唔敢相信，因為以前係喺電影見到發哥，第一套睇《賭神》，後來朋友介紹張家朗睇發哥經曲作《英雄本色》、《監獄風雲》，張家朗本身都好鍾意舊嘅香港電影，發哥笑言：「啲人想見我係喺山嗰度（野生捕獲）。」
發哥回想自己25歲嗰年演緊《上海灘》：「呢個後生仔97出世，而家係25年，佢喺世界拎金牌，嗰時仲喺香港搵食，佢已經衝出國際，你話我喺香港再去荷里活拍戲，喺嗰度見識見聞，佢要出去『打仗』，我哋要長時間 鋪排，又劇本又拍，佢上場壓力好大，一生係為咗15分，演藝生涯好漫長，而運動員生涯冇咁長時間，佢好早就要為理想奮鬥，佢走嘅路程比我哋艱辛好多，佢8個鐘來來去去都做一個動作，我哋拍一、兩個take就換動作，佢哋好辛苦。」張家朗指香港精神就係大家都好捱得、唔容易放棄，張家朗希望透過比賽畀大家睇到自己嘅堅持，打好每一次比賽。
發哥好耐冇為品牌影封面，佢多謝張家朗嘅邀請，張家朗指喺腦裡面嘅發哥係巨星，好怕自己唔識講嘢要拍好多個take，幸好發哥帶住佢講嘢，令成件事好舒服，發哥稱喺香港每個階層，每一個出人頭地嘅人，大家本身都由基層做起，發哥續道：「香港人有一樣嘢係好，我行出街，大家對我好好，佢哋唔覺得我係一個演員同明星，周潤發就係我老友。」
發哥向張家朗分享心態調整好重要：「當你喺咁高，你要將身段放低，所以你個教練教你輸，你有脾氣就唔好喺嗰度發，當你有(高位)撳番自己落去，當你低(谷)就要將自己提高，唔好覺得自己好坎坷，當你高嗰陣，唔好覺得自己好高貴，中庸之道係最好。」
發哥跟張家朗惺惺相惜，越講越開心，發哥又指張家朗成長並非一朝一夕：「過程係自己慢慢成長，點解喺巴西拎唔到，之後你拎到，就係呢4年嘅沉澱。我亦都唔係一出嚟就拎金馬影帝，或者香港電影金像獎影帝，係要好多鋪排，好驕傲你係香港第二面金牌，仲要係回歸第一面金牌。」發哥笑指跟張家朗互換角色：「你教我打劍，我教你做戲，我諗都幾好玩。」