陳茵媺 事隔多年之後復出；仲同老公 陳豪夫妻檔合作嘅新劇《羅密歐與祝英台》日前完成拍攝，呢日一眾演員同幕後同事就齊齊聚餐慶功喇，其中生小朋友之後就一直主力擔任媽咪職責嘅Aimee，就話非常唔捨得今次合作嘅拍檔呀。

雖然要重拾拍攝工作一啲都唔易，不過今次拍攝其實非常開心咁話。Aimee又話屋企嘅幾位小朋友就有啲不滿父母一齊開工唔見人，仲有唔少投訴意見呀。

至於啱啱出爐嘅應屆視后 江美儀 呢晚就不停獲大家祝賀，連日嚟大家嘅祝賀訊息仲炸爆電話，佢仲話會努力逐一答覆答謝大家，不過就需要少少時間喇。原定打算新年期間外遊充電嘅佢，又因為各地唔同政策而卻步，所以就打算遲少少下個月再出發去滑雪喇。

周嘉洛 同樣成為大家嘅目標，不過就係因為佢遲到所致，而喺頒獎禮榮獲最獲歡迎男角色嘅佢，仲被大家要求拎1萬蚊獎金抽獎補數，佢仲話已經準備好利是喺新年狂派，仲話今年嘅利是封係自己親手寫，希望大家出年都一樣咁掂呀。

蔣祖曼 喺劇中同幾位演員情如好友，到拍攝完成就令佢非常唔捨得，幾位「金木水火土」仲話拍攝時火花十足，由頭笑到尾咁話呀。

TVB定期舉辦傑出員工選舉，今日揭曉2023年上半年度傑出員工，三位得獎者有兩位係藝員同事，就係陳豪同朱凱婷，陳豪效力公司23年，首次獲得TVB傑出員工獎，佢接受TVB娛樂新聞台訪問同大家分享喜悅！

陳豪多謝咁多同事投票佢一票，好開心可以獲獎，陳豪續道：「話晒我係公司員工成廿幾年，金牌都拎咗兩個，而且一直係公司前線人員，冇諗過有份拎呢個獎，我以為幕前係冇份，以往係畀幕後一個獎勵，原來幕前可以分到一杯羹係開心嘅，亦希望拎到呢個獎嘅人可以將自己嗰份正能量、好嘅態度宣揚開去，令公司營造有更加好嘅營商環境。」

擁有美滿家庭嘅陳豪，對老婆陳茵媺（Aimee）及三個仔女愛護有加，未同佢哋報喜已計劃點去慶祝，陳豪又指：「仔女未知呀！我諗佢哋都好開心好興奮，不過Heidi（朱凱婷）係我老婆Aimee啲好朋友，變咗佢有同我老婆講，我都冇同老婆講，反而係Heidi講，我老婆先知！」而朱凱婷感謝提名人，佢開心可以同陳豪一齊拎獎，呢個係雙重喜悅！