有情歌王子之稱嘅周興哲Eric，嚟緊2月將會嚟到香港，舉行首次個人紅館演唱，呢日Eric接受《StarTalk》嘅訪問，同主持 Edmond許文軒 傾下近況。

自言已經好耐冇嚟香港嘅Eric，指因為之前疫情嘅關係，好多事都要被逼暫停，而隨住疫情緩和，2023年剛開始，佢就決定要嚟香港開演唱會，而且仲要係挑戰紅館嘅四面台，Eric話最難嘅係唔可以令場面有冷場，但開心嘅係因為佢喺正場館嘅中間，可以用觀眾縮短個距離。

之前做巡迴演唱會嘅時候，Eric有一個脫上衣嘅環節，Edmond問佢今次紅館演唱會唔會keep返呢一part？Eric話因為之前去渡假時太放鬆，唔覺意食多咗肚仔變大咗，當佢放完假返嚟，Eric嘅經理人同佢講要準備脫上衣，佢先嚇然記起呢件事，所以當時一個星期有4日都會去做gym，Eric指修身過程最辛苦嘅係喺食嘢方面，因為要食得好清淡，只可以食雞肉同蔬菜，又唔可以食澱粉，Eric話雖然改變咗好多，但係佢都好開心可以了解到點樣令自己健康又快速咁瘦落嚟。Eric話自己係一個貪吃嘅小孩，嚟到香港呢個美食天堂有好大引誘，好似當日做訪問前佢記已經食咗碗牛腩麵，好在有經理人同做共犯，先令佢冇咁大罪惡感呀。

對於被封為情歌王子，Eric就話呢個封號幾有型，仲話情歌一直係佢好鍾意創作嘅歌曲，加上可以做王子，佢就覺得幾帥喇！唔少歌迷大都話聽完Eric嘅歌之後，會被佢把聲感動到，Eric話其實有時自己都會被自己所感動，佢仲以「恐怖」嚟形容自己嘅歌詞，話有時真係會陷入當中好有共鳴。問到如果硬要佢揀一首歌最能夠打動到自己，Eric話每一首都係佢嘅小寶貝，所以好難揀，但如果硬要揀，佢會話《你不屬於我》係佢唱起嚟最有感覺，因為首歌嘅旋律唱起嚟好傷感呀。

Eric又分享自己創作歌曲嘅靈感，仲話當中《怎麼了》嘅副歌係喺佢沖涼嘅時間創作出嚟嘅。至於講到影響佢最深嘅前輩歌手，Eric話一定係周杰倫呀！仲話自己小學時候已經好鍾意聽對方嘅歌，視對方為一個榜樣，而香港歌手方面，佢就話好鍾意張學友同方大同喇。

早前Eric憑電影《我吃了那男孩一整年的早餐》而提名金馬獎最佳新演員演員，亦因為咁而令Eric暫時比較偏向鍾意演戲，仲話希望未來可以演多啲好嘅電影呀。

出道26年嘅 Tanya蔡健雅 ，今年終於舉行首個紅館演唱會， 呢日佢接受 許文軒 《StarTalk》嘅訪問，大談首次踏足紅館嘅感受。

Tanya笑言感覺自己等咗一輩子先等到喺紅館開騷嘅機會，同時亦覺得喺紅館開騷係一輩子一定要做嘅事，而家呢件事終於要實現喇，所以Tanya話佢嘅心情係 非 常 興 奮！

其實喺九年前Tanya本身已經有機會喺紅館開騷，但當年因為開騷前不慎病倒， 令呢個演唱會無奈叫停，Tanya坦言當時自己都懷疑人生、懷疑自己，覺得咁難得嘅機會就咁白白浪費咗，加上身邊嘅朋友大部份都已經踏上咗紅館呢個舞台，所以令佢相當懷疑自己，佢仲笑言因為咁而帶畀自己好大程度嘅創傷。

有過之前嘅慘病經歷，今次舉行紅館演唱會，Tanya話會特別注重健康。事實上近年Tanya嘅生活都變得健康咗，以往要凌晨4、5點先瞓嘅佢，而家變得早睡早起，連同之前喺台北舉行嘅演唱會開場時間都提早咗，Tanya笑言佢嘅演唱會儼如「養生俱樂部」，大家睇完演唱會仲可以去食個宵夜。雖然聽落好似好完美咁，但Tanya話將演唱會提早舉行嘅呢個方式真係唔太啱佢，仲話以後都唔會再考慮提早開騷呀！

數年嘅疫情令到大家心情都曚上陰霾，Tanya坦言呢幾年嘅疫情都令自己情緒變得低落，連音樂創作都提唔起興趣，所以佢將心思轉去其他地方，好似開始勾織不同小物、做園藝、食物雕刻及沖咖啡等，當中園藝種植更加係治療咁Tanya嘅身心靈呀！