賀歲片《毒舌大狀》將喺大年卅晚正式上映，年廿九晚亦會加開優先謝票場，當晚演員仲會出動大派現金利是，同在場觀眾率先拜個早年。而電影製作特輯亦揭示扮演大律師嘅 黃子華 同戲中各位演員嘅演出，飾演林涼水嘅子華，今次角色既非搞笑，亦非以棟篤笑形式演繹，而係演繹一場又一場扣人心弦嘅正劇，今次亦可以話係佢從影以來最具挑戰性嘅演技爆發。

子華喺結尾嘅一場官司激辯戲份，除咗要背誦長篇大論嘅對白，又要推起整個法庭嘅氣氛情緒，子華話：「最深刻當然係最後拍攝嘅一場法庭戲。」而「對手」 謝君豪 亦給大讚子華，佢話：「子華各方面幾個層次都做得很好，我真係覺得好好睇。」子華亦都話估唔到自己嘅表現：「以前演《宋世傑》我都覺得好勁，可以講7頁紙，今次難度更高，有超長對白、超級情緒。有啲戲可以偷雞，但呢部唔得，對我嚟講係我嘅終極挑戰。」

子華除咗自己要狂背對白，亦一直協助其他演員入戲，好似佢嘅超級 廖子妤 拍攝一場交流戲份時，子華就然堅持喺旁訪為Fish讀對白，令佢更投入戲份演出，難怪Fish話：「子華喺每一方面都好有風範，喺法庭上講每一件事嘅時候，都真係好似大狀一樣。」

子華嘅投入演繹，亦令首次執導嘅導演 吳煒倫 非常欣喜，佢話：「有一場戲有黑社會尋仇，當中子華有一啲動作要拍一張鐡書枱，拍攝完後原來張枱被子華拍凹咗，冇想像過佢會用咁大力度去演呢段戲。另一場喺麥花臣場球拍攝，子華搵我討論一段對白，覺得唔夠完美，佢寫咗一段俾返我睇，我一睇到就非常鍾意，一個演員要有幾投入角色，先可以度到咁到肉嘅心聲出嚟？」

資深藝人溫裕紅(Esther)於5月19日安詳離世，終年54歲。溫裕紅早年主持婦女節目《都市閒情》，同時亦有參與劇集演出，曾效力無綫23年，早前播出嘅《食腦喪B》為佢嘅告別作。

溫裕紅喪禮於下月中設靈，翌日舉行安息禮拜，上午11時隨即出殯，靈柩奉移火葬場火化。

溫裕紅於2005年不幸確診患上乳癌，當時已經擴散到淋巴，不過一直積極樂觀抗癌，接受化療時要剃頭同包頭巾，後來醫生建議佢做手術將乳房切除，幸病情終於能夠控制。鄧萃雯其後為佢介紹整形醫生接受重整乳房，朋友林淑敏2010年患上乳癌，溫裕紅以過來人身份全程陪伴她度過艱難的日子，二人成為好姊妹。溫裕紅曾於2020年受訪時透露，自己身體情況好好，唔需要再服藥，只需每年做定期身體檢查。

不過與佢相熟嘅 韓馬利 就指，知悉Esther近年癌症有復發情況，但係佢依然不時同朋友見面，而近月情況亦轉趨嚴重，佢指目前喪禮後事由教會同胞姐協助處理。

自從溫裕紅離巢後，生活過得非常低調，閒時會相約朋友行山。林建明於2022年曾與溫裕紅飯聚，見溫裕紅戴上頭巾且身形消瘦。

溫裕紅早於中學年代一直玩話劇，畢業後報讀演藝學院，後來面試成功被TVB取錄成為無綫藝員。溫裕紅在TVB多年拍近百部電視劇，如《巴不得媽媽...》飾演男性化「魯玉芬」、《仁心解碼II》飾演黎繼鵬太太、《降魔的2.0》飾演「啤啤」媽媽，《BB來了》演李佳芯女強人上司Bianca，角色令人印象深刻，得到觀眾讚賞。