旅遊節目《自然系女子旅行》日前正式播出，打頭陣嘅台灣「啦啦隊女神」 林襄 日前同 暉哥 去到宜蘭嘅營區住露營車。身為吃貨嘅林襄一到營區就發現接待處嘅火爐，正烘烤香噴噴嘅蛋糕，佢哋仲即刻老實不客氣一人要兩個，女士有另一個胃放甜品嘅又一例證又出現喇。

之後佢哋就去浸裸湯放鬆身心，不過因為電視尺度關係，林襄要以大毛巾出鏡，不過依然非常性感。攝影師仲以男友視角拍攝林襄作為福利，作為「女友」嘅佢亦交足戲，擺出各種可愛動作，招待襄迷喇。曾推出寫真集《與你襄遇》嘅林襄，仲示範點樣用溫泉小道具輔助拍攝IGable靚相。

林襄同暉哥到訪宜蘭齊齊浸溫泉
之後嘅晚飯時間佢亦無負吃貨之名，同場又加插心理大測驗「如果約男朋友抗邊爐， 5種鍋或會點揀呢？」，當中分別有牛奶鍋、養生菇鍋、昆布鍋、麻辣鍋同番茄鍋。暉哥就揀咗麻辣鍋，表示佢非常相信一見鍾情，而且會係一位好媽媽、好新抱。

而林襄就揀咗牛奶鍋，表示佢係一名控制狂，25歲嘅佢就自爆話︰「自己是一個很理智清醒的女生，在感情上容易吃虧，不太會撒嬌，像一隻鐵公雞一樣。我是一個很易委曲求存的女生，小時候就想過24歲就結婚生小孩，當一個年青媽媽。」

揀鍋底心理測驗仲揭示佢哋嘅戀愛性格

至於噚晚一集，佢哋就去到台中太平住帳篷，原本面對偌大草地嘅林襄打算chill住度過，不過暉哥就係要打羽毛球同玩飛碟，但係林襄本身就係運動好手，暉哥好快體力不繼。 夜晚佢哋真情對話，又為對方預備咗一份禮物。暉哥知道林襄鍾意食同浸浴，所以合二為 一，送咗麵包味同明太子壽司味嘅浸浴包。

一向性感嘅林襄曾推出寫真，部份靚相更係非常性感
而林襄就為暉哥預備了一本超性感座枱月曆，暉哥亦問到林襄影寫真嘅底線，佢話︰ 「寫真拍太多，已經不知道尺度是什麼了。」佢哋又跟美人魚鄭教練學習著上人魚裝喺水中暢泳。

佢哋亦跟教練學習點樣成為美人魚
而逢星期四晚23:00，各位女神都會喺IG進行《自然系》直播，除咗介紹節目內容之外，仲會提供各式福利，各位記得密切留意喇。

由「暉哥」林映暉主持嘅旅遊節目《自然系女子旅行》嚟到最後兩集，佢繼續同「音樂系女神」Rubis黃上晏為大家介紹台灣營區好去處。2號晚呢集佢哋嚟到宜蘭號營區，除咗一般設備外，最大特色就係可以租越野沙灘車。
二人試玩越野沙灘車。
佢哋戴上安全裝備，先由有駕駛同類車經驗嘅Rubis載住暉哥兜圈，雖然唔係開得好快，但係已經夠暉哥緊張。之後就由教練阿寬示範飄移技術同兩轆離地特技，二位少女喺唔知情嘅情況下被邀請試玩，打頭陣嘅暉哥，喺短短廿秒嘅車程，喪叫至面容扭曲，連Rubis 都覺得佢有啲失儀。終於捱到落車嘅暉哥，以憂怨嘅望住攝影隊，埋怨大家係玩佢而唔係玩越野車，佢仲話因為喪嗌而搞到喉嚨痛添，至於接力上場嘅Rubis會有咩反應？就要大家留意收睇喇！
暉哥話事前唔知要試玩。
事後暉哥接受訪問時，話事前根本唔知要坐教練車試玩，係去到場地工作人員先話要坐阿寬教練嘅特技車，暉哥話：「我直頭覺得我喺生死邊緣遊走咁，有少少飆淚，但又覺得好好玩。」暉哥又話因為拍攝先可以迫到自己試啲平常唔敢玩嘅玩意，佢又話只要唔係跳樓同埋好危險嘅事，佢應該都會OK呀。
有台北後花園之稱號陽明山營區。
而3號晚最後一集，暉哥同Rubis就會入住有台北後花園之稱號陽明山營區。營區帳篷內裏應有盡有，有獨立洗手間又有暖氣， 連床褥亦有發熱功能，適合一眾怕冷人仕。
本身仲正常咁浸溫泉。
壓軸登場嘅就有兩位女仕提供福利浸溫泉，暉哥一臉陶醉享受溫泉時，突然煞有介事大讚溫泉透出奶香，引起 Rubis無限遐想，佢仲隨即笑咪咪俏皮咁望住暉哥胸口，而暉哥亦還以顏色反望。
畫風同話題都突然變得怪怪的。
事後問到今周嘅行程，Rubis就話最喜歡台中營區嘅豪華住宿，同喺宜蘭玩嘅越野車，至於問到佢幾時會推第二本寫真？佢就話因為未意到新嘅構思，所以未有打算再出，而目前會繼續其他唔同嘅嘗試，好似早前佢就舉辦咗一場音樂會喇。

《自然系女子旅行》星期一至五 22:30 J2