張敬軒承諾票房破2000萬騷肌 心疼英國騷歌迷高價8萬買黃牛

張敬軒承諾票房破2000萬騷肌 心疼英國騷歌迷高價8萬買黃牛

張敬軒與老友王菀之主演賀歲片《超神經械劫案下》,呢日舉行優先場,軒仔聯同戲中演員落力謝票,與觀眾互動玩遊戲,日前軒仔貼出裸跑戲劇照,率先派福利,令網民大飽眼福,更游說導演釋出裸跑嗰場嘅刪減片段。

軒仔指起初睇該片片長係2個鐘,到朋友睇而家上映版本反而覺得劇情有啲跳,講到佢哋拍裸跑戲特意練掌上壓,楊天宇喺開拍前有鍛煉身體:「為求做到最好,一開頭見導演,佢話想好似變形俠醫咁,我即話其實冇咩可能,佢話最主要操手臂,因為佢話唔使除衫,點知就除咗(衫)。」

軒仔承諾票房破2000萬騷肌,有向網民誠徵派福利方案,軒仔將前往英國開騷,提到歌迷反應熱烈,個唱飛一票難求,更有傳炒至天價8萬元一張,軒仔稱呢位歌迷呢日都在場,早知自己唱畀呢位歌迷聽,笑稱可以問價,軒仔並唔同意買黃牛,不過佢唔考慮再加場,想之後歸隊與眾演員一齊出席謝票活動。

張敬軒被粉絲催著泳褲謝票 被製作AI片騙案感細思極恐

張敬軒 完成新加坡工作返港冇耐,呢日就現身活動同10位幸運Fans飯聚一番,不過大家就當然醉翁之意不在酒,除咗享受同偶像共處時光外,更不忘追問軒仔幾時先肯找年初嘅「叱吒我最喜愛男歌手獎」數,仲要求佢著泳褲謝票。

對於大家嘅大膽要求,軒仔就話:「夏天要到喇,等我身體準備得好啲先!」而且軒仔更希望謝票活動可以做得有意義又認真啲,唔係胡鬧完成。不過當軒仔被問,想著咩款式泳褲時,佢又回復鬼馬本性:「我都係一個游泳好手,所以以喺水入面嘅擴張能力最細嚟計,咁都係三角褲。」令在場傳媒都紛紛嘩然。

雖然軒仔一直都行開斯文路線,不過佢都曾經有「性感」一面,就係為舞台劇拍攝全裸海報,佢仲呼籲大家上網搵返張相睇,欣賞下佢副好Body。雖然過去輝煌過,但被問道會唔會操得返好似當年咁勁時,軒仍就話:「人生有願望係好事。」

網上AI騙案日漸猖狂,就連軒仔都成為目標,被騙徒以AI同Deep Fake技術整製作英文訪談片呃人錢,呢日軒仔都話成件事完全細思極恐,仲話騙徒連佢嘅圍頭口音都改埋變澳洲口音。不過問到有冇叫媽咪小心啲時,軒仔就大派定心丸話:「我阿媽連我都唔信架,放心!」而軒仔亦透露,有Fans不慎被騙,損失金額可觀。

 相關推薦

熱門搜尋