新春開運王|陳定幫師傅帶路行大運 麥玲玲山頂吸天地靈氣

新春開運王|陳定幫師傅帶路行大運 麥玲玲山頂吸天地靈氣

賀年節目《新春開運王》喺新春期間繼續教大家開運順利過新年,今晚大年初二嘅一集, 陳定幫 師傅就會帶大家去大埔白石角行大運,幫幫師傅更會喺節目解構白石角風水特別好嘅原因。

之後幫幫師傅再同大家一齊去文武廟,解開拜文昌唔止可祈求學業運,文昌星亦代表住名譽同競爭,而同行嘅 郭柏妍 徐文浩 陳懿德 仲乘機許下兔年願望呀。早前一唱驚人嘅Rosita就好緊張幾時可以擺脫魔音污名,陳懿德就問到自己幾時可以上位成為「麥美恩2.0」,兩位靚女兔年願望可唔可以成真,就要留意今晚節目喇。 

Rosita同德德都希望兔年事業可以更進一步,唔知師傅又點睇呢?

而 李家鼎 同 Bob林盛斌 又會齊齊食 「新春開運菜」,多仔公阿Bob仲被指今年同老婆會 有拗撬,仲有機會再添新家庭成員呀! 

已經有三女一子嘅阿Bob,被指今年有機會再添新成員,唔通係佢成日有大膽想法嘅結果?

至於聽(24日)晚年初三, 麥玲玲 師傅會率領大家齊齊上山頂吸收天地靈氣,又會分析山頂、中半山同山腳嘅風水優劣之處。至於「開運有『元』機」環節, 元海 師傅會教大家打麻雀開運法,致勝之道仲同衣著顏色有關。

而 崔建邦(Amigo)同 黎諾懿 應邀食「新春開運菜」,命格屬木嘅Amigo就被玲玲師傅批大起大落似賭仔命,Amigo又借機向玲玲師傅道謝:「以前遇過一次重大挫折,嗰時搬到好遠,玲玲師傅都專登過嚟安慰我、幫我睇(運勢),呢件事擺咗喺心好多年,終於可以喺鏡頭前多謝你。」 至於諾懿就被指兔年宜挑戰冷門事物同往東邊發展喇。

崔建邦公開多謝玲玲師傅當年雪中送炭

《新春開運王》星期一至三晚 22:30 翡翠台

郭柏妍為新劇苦練大提琴 黎諾懿稱背部全裸有寓意

仁濟醫院呢晚舉行周年慈善舞會,邀請到黎諾懿、周柏豪、郭柏妍Rosita、鄭融等出席。Rosita將於新劇中飾演大提琴手,佢表示自己對大提琴零認識,幸好監製羅永賢好早已經安排佢去學大提琴,Rosita笑言學大提琴嘅經歷可以話係一波三折,因為佢學習期間,要去台灣拍攝《尋找世界另一個我 台灣篇》,但當時唔小心整傷咗右手,令佢一度拉唔到琴,拖慢咗學習進度,Rosita話因為咁而日自己非常努力喺屋企練習呀。

黎諾懿喺劇集《婚後事》入面背部全裸嘅一幕引起熱話,同時亦有唔少網民讚佢演技大躍進,對此諾懿話係開心事,因為證明大家有睇。諾懿又話同賴慰玲呢場出浴戲,其實佢哋兩個度咗好耐,一個浸浴缸、一個喺企缸,係代表住佢哋兩個唔同嘅態度同角度呀。

早前陳家樂同連詩雅傳出懷孕好消息,身為好友嘅周柏豪笑言睇住連詩雅長大再成家立室,所以好戥對方高興。柏豪話希望Shiga嘅BB係男仔,因為佢話自己囡囡有好多朋友,但係囝囝大個咗後就暫時未有男仔朋友,身邊嘅鄭融聽到後忍唔住話:「真係辛苦爸爸喇 ,仲要諗埋人哋肚入面嗰個係咩性別。」至於講到成班朋友入面好似爭鄭融一個未結婚,鄭融就話自己冇咩壓力,同埋自己一個有自己一個嘅快樂呀。

 相關推薦

熱門搜尋