不時都會爆出唔少驚喜嘅處境劇《愛．回家之開心速遞》，一向都非常受觀眾歡迎，而近日佢哋為大家送上最新嘅兔年禮物，就係邀請咗 Gigi炎明熹 客串，早前我哋就獨家直擊咗拍攝嘅過程喇。

Gigi呢次演出雖然只係做返自己，不過佢都一樣做足功課，本身已經係《愛．回家》迷嘅佢，仲話要同晚晚「見面」嘅各位演員合作，諗起已經非常緊張，老友手汗仲出哂嚟同大家Say Hi咁話喎。

話晒都係劇迷之一，Gigi就話自己最深印象就係早前播出，熊若水成為唧暗瘡達人嘅一集喇，仲幻想自己可以客串呢一集演出呀。Gigi兔年一開就有非常好成績，好似歲晚就先後受邀演出央視同廣東衛視兩個大型春晚喇，Gigi仲話非常榮幸有份參與演出，仲獲成龍大哥現場指點呀。

除咗大型演出之外，Gigi又喺幾個內地大型頒獎禮接連得獎，佢就話每一個獎項對自己都非常重要，亦係自己最大嘅推動力，仲要非常感謝一直協助自己嘅幕後工作人員咁話呀。過年期間Gigi亦趁放假返家鄉同屋企人共聚，Gigi仲準備咗大利是送俾家人，表達自己嘅孝心呀。

處境劇《愛・回家之開心速遞》嘅HIP HOP組合「大四喜」不時會潮爆Rap歌登場，觀眾對幾位銀髮族嘅演出都讚不絕口，呢日身為「大四喜」成員嘅熊樹根 劉丹，就閃爆現身拍攝歌舞場面，劇中飾演佢個女熊若水嘅呂慧儀，仲着試大四喜嘅應援衛衣現身。

丹爺就話因為四個成員都係「老嘢」，為免唔記得歌詞所以記要做啲小手腳出下貓，好似喺背脊貼貓紙咁，丹爺笑言係因為其中一位成員記性開始麻麻地，所以先要動用到貓紙，不過為保護嗰位隊友，丹爺就話唔開名喇。

劇中做最強啦啦隊為大四喜打氣嘅呂慧儀，佢一身衛衣配長褲嘅打扮，被笑指同大家印象中嘅啦啦隊有好大分別，呂慧儀即刻反駁話而家嘅啦啦隊已經唔興着短裙配啦啦球，佢嘅長褲造型先係最潮嘅啦啦隊打扮咁話呀！

丹爺又笑言呂慧儀身上件「大四喜」應援衛衣唔係咁易買得到，而呂慧儀就笑言打完拍完呢場戲，就偷偷地收埋件衫之後放上網賣呀！