由林建祥監製《愛•回家之開心速遞》逢周一至日晚八點翡翠台播映。每集為觀眾送上驚喜，噚晚第1,846 集《兩小無猜戀錯咗》再獻新猷，邀來《聲夢傳奇》第一季總冠軍「傳奇新星」炎明熹（Gigi）登場客串演出。
角色與真人一樣有禮貌
雖然Gigi只係輕鬆演回自己，演出片段只有數分鐘，但Gigi傾力演出成功引起高度關注及支持，劇中Gigi以自己別具風格嘅說話節奏演繹角色，又發放大量可愛表情包，加上深情演繹個人作品《好想約你》，吸引網民紛紛留言正評，更有網民封Gigi為「星爺2.0」，更指好鍾意Gigi講話tone，有自己嘅節奏，覺得 Gigi好適合拍喜劇，佢嘅節奏完全係天生喜劇人，更有粉絲指Gigi劇中角色與現實一樣好好禮貌。
噚晚劇情講述Philip仔（梁禹勤飾）及技蘭（黃厚仁飾）因同為Gigi粉絲，二人因一次商場追星活動結為好友，由於交往頻密，令大小姐龍力蓮（林淑敏飾）及錢栖（蔣家旻飾）等人懷疑二人拍拖，因而鬧出連串笑話，最終眾人齊齊殺上郵輪，喜獲與Gigi同枱食飯機會。
一人分飾技安及技蘭嘅黃厚仁可謂「忙個不停」，Keep住要轉換於「技安」及「技蘭」兩個唔同身份，喺商場追星期間，分飾技蘭嘅厚仁更要力谷肚腩仔扮演「人肉彈床」，幫助Philip「一躍成名」成功吸引偶像Gigi注意；呢一幕劇情設計，令「技蘭」成功入屋，贏盡焦點，紛紛留言「今集好好笑，技蘭嘅肚腩好圓」、「Philip仔跳技蘭個人肉彈床嗰幕真係笑到肚痛」、「技安一人分飾兩角幾勁」、「希望技安/技蘭會多啲喺宋家出現，今晚個組合好好睇」。
《愛‧回家之開心速遞》逢周一至日晚八點翡翠台播映