TVB綜藝歌唱真人騷《中年好聲音》，由1月29日起、逢周日晚上8 點半翡翠台播出，本周日一集繼續進行第三部曲次回合《影視金曲生死鬥》，20強選手獻唱經典電影或劇集金曲比賽，是集出戰選手共有9位，分別為支嚳儀、羅金榮、顏志恒、梁愷庭、林鉫徫、吳大強、周吉佩、羅啟豪及區俊傑。
是集可謂強強對碰，皆因有4位五燈選手登場，包括支嚳儀、林鉫徫、吳大強及周吉佩，另外仲有兩大黑馬顏志恒及羅啟豪。「浴室歌王」顏志恒是集大晒感性一面，身為廚師嘅顏志恒，兼顧工作與比賽非常吃力，賽前受訪時感激太太嘅默默付出，讓佢可以無後顧之憂比賽，顏志恒一度哽咽：「其實我太太好辛苦，好多屋企鎖碎事我都抌低咗，呢排都係靠佢撐住我！」顏志恒選擇獻唱殿堂級歌手徐小鳳嘅《婚紗背後》，肥媽聽畢直言：「我好鍾意呢隻歌，當見到佢話唱呢隻歌時，我係『吓！男人唱呢隻歌？』但佢又用到自己方法去表達到個感覺。」女歌男唱能否為顏志恒帶來高分數，周日自有分曉！
顏志恒羅啟豪女歌男唱
於上一回合彈出嘅黑馬羅啟豪同樣係女歌男唱，獻唱天后容祖兒嘅《連續劇》，其靚聲及清晰咬字獲一眾評審大讚，出名要求高嘅張佳添表示：「呢啲咪係Less is more，一集比一集更加進入狀態。」周國豐則指羅啟豪係越戰越勇嗰隻，特別鍾意佢咬字好清晰。
至於由頭帶到尾嘅吳大強是集獻唱英文老歌《Quando quando quando》，吳大強邊唱邊跳表現十分風騷，張佳添大讚：「你令我投入咗你嘅音樂世界，無論咩年紀都好，聽完之後直情回春呀！」是集將有兩位參賽者表現失準，除咗被狠批似唱K兼欠個人特色，其中一位更被指係災難級演出！究竟為何如此災難？密切留意周日晚播出《中年好聲音》。
《中年好聲音》逢周日晚8點半翡翠台播映