甄子丹監製、導演及主演嘅《天龍八部之喬峰傳》於1月19號農曆新年前上映，甄子丹將《天龍八部》喬峰部份嘅故事改編搬上大銀幕，整個班底不計酬勞，在有限資金及製作時間內，創造出讓人著迷嘅動作世界，一個故事總會有反派角色，提到天龍八部又怎能欠缺「馬夫人」康敏，今次飾演此角就係王君馨（Grace）。
王君馨一年前挑戰參加內地跳舞比賽，冇諗過喺不斷晉級同時，收到丹爺邀請加入新戲《天龍八部之喬峰傳》，王君馨回想當時丹爺叫佢畀個人介紹資料：「心想當然好！但係都冇諗太多，點知過咗幾日就收到劇組通知我，揀咗我。」
王君馨得知被選中後，立即「做功課」，翻查「康敏」呢個角色嘅參考資料，到第一天開工，王君馨說：「當見到丹爺，佢問我知道咩原因會選我，佢話感受到我團火，仲話自己係想搵一個對工作有熱誠、有火嘅人，而唔係開工等收工嘅人；我好感恩丹爺對我講呢番說話，聽到一個前輩讚自己，我同自己講就算辛苦都更加要盡力！」
王君馨首次跟甄子丹合作：「丹爺人好好，佢喺現場會同你講演呢個人物嘅情緒，會告訴演員鏡頭係點樣拍你、你要為呢個角色加啲咩去令呢個角色睇落更加精彩同層次；佢分享好多自己嘅經驗，不過係秘密，唔能夠同大家分享，哈哈！」
