由 陳維冠 監製、 鄭成武 編審嘅《新四十二章》，將喺下星期一起首播，新劇版 陳豪 龔嘉欣 鄭子誠 江嘉敏 周嘉洛 鄺潔楹 譚凱琪 糖妹 林景程 同 易宇航 等演出。《新四十二章》圍繞「尋寶」同「維度」作主題，集齊天馬行空、輕鬆惹笑同節奏緊湊嘅打鬥場面等唔同元素，角色無論性格同造型都非常有趣。
劇集中扮演中文系大學教授嘅 章經(陳豪 飾)同「數理天才」邵一算(鄭子誠 飾)，原來已經係第八次合作，除咗早前嘅話題劇《殺手》、《誇世代》同《天與地》之外，仲有《妙手仁心III》、《潮流教主》、《絕世好爸》同《洛神》，「豪誠」今次除咗繼續保持佢哋嘅喜劇節奏，亦喺監製巧妙安排之下迎接唔少突破。
陳豪飾演嘅教授除咗小動作古靈精怪，又成日拎住一把似係藏有玄機嘅紙扇，又經常出口成文、引經據典，阿Mo受訪時就搞笑指自己終獲機會一展所長喇：「由於本身我嘅中文水平非常強勁，普通話簡直係我強項，今次難得遇到中文教授嘅角色，可以話係『如虎添翼』，將我心入面嘅『詩句』發揚光大……」
而劇中對白涉及唔少古文，佢就話自己做足功課：「除咗上網Search，都會透過一啲朋友介紹向大學中文教授請教，古文發音有一定難度，我差唔多用齊中文、英文、甚至符號等等做標記，總之就係施展渾身解數,，希望可以準確拿捏發音！」
至於飾演「數理天才」嘅子誠都一樣落咗唔少功夫，喺劇中一直炒股同開咪為樂嘅佢，滿口數據同科學理論，對白艱深更相當翹口，令拍戲經驗豐富嘅子誠都話被考起：「一來年紀漸長記憶力開始下降，加上嗰堆道理要好有信心講出嚟之餘，又要一字不漏。」
子誠又話角色開咪部分係仿照自己嘅招牌電台節目《音樂情人》：「所以只要我Keep住溫柔嘅感覺，懶係情意綿綿地咁講一大堆說話就可以喇。」搞笑又得，扮奸亦得嘅子誠，今次再獲監製欽點「特別任務」，就是仿效Judy劇中嘅角色學佢扮嬌嗲：「有場戲我要教陳豪追女仔，咁我就要仿效Judy做啲嬌嗲動作，對我嚟講真係好難，我每次做都毛管戙，拍嗰日又拍極都拍唔好，自己都有少少火滾。我唔敢睇playback，因為好骨痺。」
而講到同陳豪第8度合作，子誠就話驚訝，仲笑言佢哋嘅關係循序漸進：「最撻著係《殺手》，我同佢互拋互接咁就擦出咗啲火花。同佢合作最開心，係每次個廠都會無限供應Mo啡，對於我哋成日通宵達旦嘅嚟講，係好大喜悅。」
而劇中另一「學術」代表，係飾演臨床心理學家關玉菁嘅譚凱琪(Zoie)，Zoie仲話角色髮型都係由監製指定：「我都一路等緊一個劇同我大改造，因為平時啲造型都係穩陣派，呢個髮型幾有新鮮感。」首次扮演專業人士嘅佢，透露演繹角色時刻意減少尾音打造專業感，又非常難忘劇中嘅開槍場面，因為唔可以眨眼之餘，效果亦相當有型。而喺劇中嘅最大突破，Zoie就透露係凌晨拍攝裸泳戲份：「我有著晒肉色衫打底嘅，但因為當時係凌晨冇乜太陽，所以真係有啲凍。」
《新四十二章》1月30號起 星期一至五晚20:30 翡翠台