星爺周星馳於初二（23號）於IG貼出寫揮春嘅影片，原來佢寫緊「心想事成符」，星爺更稱呢個「心想事成符」可以助別人願望成真，佢希望送贈畀有緣人，叫大家留言證明自己係有緣人，之後佢會抽出20位幸運兒。
星爺呢個post吸引逾31000留言，今日星爺終於公佈「#有緣人是你」，當中有胡杏兒、林盛斌（Bob）、蔡卓妍（阿Sa）、馮素波、創作歌手陳零九、男歌手謝坤達、創作歌手賴宇涵、江熚生、YouTuber江佑真及馬來西亞Youtuber蔡常勇等。
「有緣人」留言亦相當有趣，胡杏兒之前留咗一堆emoji，星爺叫杏兒幫忙拆解「暗號」，馮素波留言問星爺：「長者有冇特別照顧呀?」星爺回覆：「咁橋我都係長者。」而Bob重提之前去番禺拍《少林足球》往事：「唔怕老實講，上次去番禺嗰兩個禮拜嘅《少林足球》，你哋俾我嗰封利是，係冇入錢落去，入面淨係有張紅紙仔，寫咗『心想事成』四個字，我keep到而家，如果有埋呢個『心想事成』嘅揮春，咁就可以湊成一對，成件事會浪漫同合理好多！」星爺就問方便睇吓張紅紙仔?
Bob當年讀大學二年班，在同學慫恿之下，參加電影《少林足球》招募大賽過三關，被星爺揀中，前往番禺拍戲，Bob與「螳螂拳」同房，拍攝到一半，可惜中途出現人事變動，要重拍兼改劇本，Bob為咗學業拒絕留低，劇組畀咗一封利是作為演出酬勞，成件事就告一段落，未知Bob口中嘅「紅紙仔」係咪真係得「心想事成」！？
歌手謝坤達笑指願意拎如來神掌秘笈同星爺換「心想事成符」，星爺就話一手交符、一手交笈；另一位就係「有緣人」就係星爺當年喺西貢拍《國產凌凌漆》嗰陣，喺化妝間曾同星爺玩嗰個小朋友，原來當年星爺曾笑佢個頭嘅造型係垃圾頭，仲話帶佢上《430穿梭機》，星爺留言：「𡃁仔原來係你！」
蔡卓妍一向係星爺影迷，揚言睇過星爺每齣電影最少睇咗20次，早年星爺喺糖水舖巧遇蔡卓妍，埋單時，獲老闆告知周星馳請客，蔡卓妍與偶像緣慳一面，今次收到星爺「心想事成符」應該好開心！