JJ林俊傑巡迴香港站4場門票火速售罄 終極加開2場

2023年迎來JJ 林俊傑入行嘅第20個年頭，宣佈將於3月下旬假中環海濱活動空間舉行巡迴香港站，作為官方公佈嘅第一季世界巡迴演唱會唯一亞洲站！
 
繼早前宣佈加開兩場，合共4場嘅門票均被火速搶購一空，JJ決定終極加開 3月17號及 3月24號共兩場演唱會，令更多歌迷可以購票，八成門票將直接喺 2月2號上午11時起公開發售！

今次為咗香港樂迷，JJ首次將巡演場次一加再加，尾場演出更係JJ生日前夕，早前宣佈加場時，JJ呼籲歌迷入場同佢過生日，直言非常感謝樂迷嘅熱烈支持：「我答應過歌迷能唱盡量唱，所以能加場的就盡量加場加到滿，唱完六場我想要吃六個奶油豬仔包！」
 
《JJ林俊傑 JJ20 世界巡迴演唱會》香港站由耀榮文化主辦，將於3月17 至19 號及 3月24 至26號於中環海濱活動空間舉行；
2023年正係JJ出道滿20年，別具意義，20年對JJ來說係一個不容易嘅里程碑，不少香港樂迷都引頸以待，向來寵粉嘅JJ，喺每一站巡迴個唱中，都希望締造一啲獨特嘅回憶予當地歌迷，有鑒於JJ已有多年冇見過香港樂迷，今次特意將香港站嘅歌單增至40首，以歌曲答謝歌迷在二十年間於其音樂及創作路上一直相伴，而演唱會開始時間亦有別於傳統晚上8時舉行個唱，提早1小時於晚上7時舉行，呢次世界巡迴演唱會，JJ更創作出主題曲〈7千3百多天〉，以紀錄20年來喺音樂上嘅創作堅持。