TVB新劇《新四十二章》結合歷史及功夫元素，陳豪喺劇中身懷絕技，呢日一眾演員龔嘉欣、江嘉敏、譚凱琪、鄭子誠及糖妹等現身為劇集造勢宣傳，陳豪親身上陣舞獅，仲向fans大派利是，場面相當熱鬧。

龔嘉欣今次角色打破以往形象，笑言每次同監製陳維冠合作通常有「驚喜」，要演女仔生鬚嘅造型，陳豪大讚：「你有咩戲電視史以嚟見到女主角全程黐住鬚。」龔嘉欣爆陳豪見到呢個霸氣造型有笑，陳豪喺劇中演中文教授，不時要講長篇大論嘅專業對白，反而佢話輕鬆應付古文對白，陳豪笑言最難係逼自己一句英文都唔講得。

龔嘉欣讚陳豪演教授好勁，行來行去講古文，對白真係背到滾瓜爛熟，次次陳豪都一take搞掂，鄺潔楹及江嘉敏呢次造型都有突破，鄺潔楹要以爆炸頭造型登場，江嘉敏為拍續集甘願Skinhead，江嘉敏笑指媽咪睇完預告片話自己多咗個仔。

鄭子誠透露入行以嚟最大挑戰，喺劇中要教陳豪追女仔，佢要向「阿女」江嘉敏嘅好友鄺潔楹取經，指鄺潔楹做咗好多好怪嘅動作，做得好辛苦，出街後都唔會望；譚凱琪飾演臨床心理學家，主要跟陳豪演對手戲，幫其改善失眠症狀。

TVB劇集《新四十二章》喺3月2號播出大結局，陳豪、龔嘉欣、鄭子誠、江嘉敏、周嘉洛、鄺潔楹(Judy)及譚凱琪等呢日現身商場出席大結局齊齊睇，今次活動亦係三年疫情以嚟首次可以除罩示人，為咗隆重其事，大會邀請200位劇迷到場支持，更吸引幾百位路人圍觀，氣氛相當熱鬧，可以見到觀眾即場反應，眾演員都覺得好開心。

龔嘉欣爆所有演員都未睇過結局，自己都好期待，陳豪笑言因口罩令大家戴上口罩，佢都好耐冇見過大家個樣，陳豪坦言抱住防守心態，喺人多嘅地方都會戴口罩；周嘉洛同江嘉敏嘅咀嘴戲亦喺大螢幕重現，見二人拍吻戲勁投入，不過仍哋異口同聲唔怕傳緋聞，江嘉敏稱印象中係冇錫咁耐。

劇中「七彩奪命沙」場口，令人印象深刻，鄺潔楹透露所有機關係工作人員人手搭建，拍攝期間困難重重，而拍檔鄭子誠則大吐苦水：「我好似帶住一個女或者孫入咗主題樂園，佢鍾意波波池同機動遊戲。」鄺潔楹笑言劇情關係，要壓住鄭子誠或者騎上鄭子誠膊頭，一個動作要做幾個鐘，鄭子誠感謝監製安排：「如果編排嘉敏同我一組，佢嘅身形同Judy差啲，佢咁樣壓我，唔係好掂。」監製陳維冠透露已有續集構思，所以喺結局位留下伏線。