香港動作特技演員公會受疫情影響，停辦兩年嘅春茗聯歡晚宴，喺今年大年初七終於隆重舉行，出席包括曾志偉、袁和平、元秋、余安安、楊盼盼、元華及徐小明等，仲有一眾會員現身，當中最年長嘅老會員「花仔源」楊國源已102歲高壽，眾人歡聚一堂。
會長錢嘉樂致詞時，多謝各屬會嘅好朋友，每年春茗公會為表揚前輩們對動作電影嘅努力付出及貢獻，今年獲得傑出貢獻大獎有「山怪」劉善榮、「巴山」梁東厚及張永漢，而大師兄徐忠信嘅女兒代爸爸領獎，傑出動作表演大獎就頒予「亞虎」張榮祥。
另外，曾志偉及林國斌各捐10萬元予公會作慈善活動及常務營運，志偉話工會越辦越成功，全因會長錢嘉樂出心出力去做，志偉笑言：「總需要有錢嘉樂呢種人不厭其煩咁做咁多嘢，我畀佢煩到我就死，我希望工會蒸蒸日上，做得更好，因為有你哋大家支持，每年大家都要嚟，而家疫情過咗，希望每一季都有一個茶聚，大家要嚟食窮錢嘉樂。」
