美國探愛兒後轉往日本避年 溫碧霞與老公二人世界賞美景

近年因為疫情經歷過多次隔離，又同老公分隔兩地嘅 溫碧霞 一直忙碌工作，終於等足三年之後，終於可以再同老公拍拖去日本賞雪喇。

Irene同老公Kenny同家人拜年後，就即刻起程去日本拍拖二人世界度新歲。Irene心情靚靚話，「已經3年冇去日本好興奮呀，我抵埗同Kenny去到酒店擺低行李，第一時間就去歎碗熱辣辣拉麵，好好味呀！好懷念嘅味道 !」

而Irene日本之旅第一站就去咗主題公園玩返夠本，佢仲戴住毛毛兔仔頭箍攬住公仔同老公Kenny喺樂園內甜蜜合照。原來呢啲飾物同公仔都係Kenny送俾Irene，當正老婆係小朋友咁疼錫。旅程期間Irene狂影相打卡，而Kenny就成為專屬攝影師。搞到Irene都大讚老公夠晒Pro，根本就係放閃之旅。

Irene近日已同老公轉往另一站富士山，近日當地正落大雪，喺富士山下邊賞雪，邊浸溫泉，情景浪漫。Irene話：「雖然睇唔到富士山頂，不過有落雪又可以浸溫泉，氣氛超正！」仍身處日本嘅Irene雖然未放完假，不過已經話唔捨得假期結束，仲透露回港之後就要立刻投入工作，當中仲包括宣傳佢嘅半傳記式電影《我們的十八歲》。