由魔術師 甄澤權 馮盈盈 同 何依婷 主持嘅全新綜藝節目 《魔法伽利略》，聽晚(2號)起播出， 節目除咗有Louis嘅神級魔術表演之外，亦有需要觀眾動腦筋嘅環節，仲會透過「美女助教」FYY同Regina輪流表演，由 湯兆昇博士 同 詹國龍博士 輪流以專業角度拆解箇中原理，教大家分辨魔術同科學。

節目每集又會邀請四位星級嘉賓分成兩組進行比賽增加趣味性，齊齊估吓FYY同Regina嘅表演到底係科學原理定係魔術。 

《魔法伽利略》將由Louis Yan同馮盈盈、何依婷一齊主持
而節目第一集，嘉賓將由 蔣家旻 羅天宇 VS 馬貫東 連詩雅 ，Louis將表演 「轉移」同「第六感」魔術，當中「第六感」魔術連Louis本人都講到明係超危險魔術表演： 「有咩閃失，我唔使再做魔術師！」

Louis需要依靠第六感，喺四把工業用釘槍當中，揀三把冇裝上釘嘅，仲會直接以人手測試釘槍係咪有釘，萬一揀錯Louis嘅手就會即時掛彩，所以整個表演過程都嘩聲四起，而被邀請參與嘅Angel仲責怪Louis：「又係我？我係咪同你有仇？」馬貫東就好擔心咁問Louis：「呢個魔術你玩咗幾多次？」

對自己表演充滿信心嘅Louis，又一度想請以Shiga嘅玉手做測試，嚇到準人妻Shiga尖叫連連，場面極為緊張刺激。

Louis仲一度以Shiga玉手示範，嚇到佢花容失色
而何依婷以手機吹熄蠟燭嘅表演亦相當神奇，到底佢係玩魔術定係靠科學原理完成表演呢？至於後晚一集嘉賓，就係 黎諾懿 陳敏之 VS 黃婧靈 陸浩明 。Louis呢集表演兩大 「預知」魔術，自認係「大衛高柏波」、但被6號笑指係「大腦黑洞」嘅波波獲邀參與表演，雖然只係簡單嘅「隨機拮爆四個唔同顏色氣球」，不過由於Louis無論喺被人手遮眼、定係紙袋笠頭嘅狀態下都料事如神，最後仲攞出一張令全場歎為觀止嘅預知字條，嚇到當事人波波眼都凸埋！

波波上陣示範，不過就被Louis嘅表演嚇到O嘴
而Louis喺緊接嘅估骰仔魔術表演中，再度發揮了驚人預知能力，嚇到敏之數度大叫「Amazing」、「OMG」。波波事後受訪時笑言：「真係估唔到佢會估中晒，依家見到佢好似咩都被佢睇穿晒咁。好期待佢下 次玩刀鋸美人，我想畀佢鋸吓，咁就知有冇造馬！」

《魔法伽利略》星期四、五晚22:30 翡翠台

TVB聯乘淘寶噚日（5月31號）舉行第九場直播騷邀來黎諾懿、陳自瑤、湯洛雯、高海寧、朱晨麗及何依婷參與帶貨。噚日直播騷 以「香港小姐」作主題，一班主持以華麗造型亮相，獲不少網友大讚靚仔靚女。

TVB聯乘淘寶噚日舉行第九場直播騷。

同屬前港姐嘅高海寧、朱晨麗、湯洛雯及何依婷，為帶貨升呢「講姐」落力Sell貨，角逐帶貨女王殊榮。噚日直播騷由下午5點進行至深夜2點，經過長達9粒鐘無間斷直播帶貨，最終全場銷售額突破1億人民幣（約1.1億港元），累計觀看人次近1,000萬，成績斐然。

高海寧、何依婷、湯洛雯及朱晨麗參與帶貨

一班港姐出場時已睇頭十足，高海寧、朱晨麗、湯洛雯及何依婷齊齊化身Model，戴上名貴首飾行Catwalk，大晒高貴大方一面，高海寧身形更係弗到漏油。湯洛雯及何依婷首度帶貨，表現非常落力，何依婷換上運動裝示範試用運動儀器，湯洛雯化身廚娘煎牛扒，有網民笑言其未婚夫馬國明好有口福！
何依婷換上運動裝示範試用運動儀器。湯洛雯化身廚娘煎牛扒，有網民笑言其未婚夫馬國明好有口福。