黎耀祥鄧萃雯約李添勝張華標《巾幗梟雄》Re-U 難忘柴九四奶奶最強CP

人生有幾多個十年？《巾幗梟雄》自2009年4月首播至今，已踏入13年，當年黎耀祥及鄧萃雯組成觀眾心目中嘅最強CP，《巾幗梟雄》及《巾幗梟雄之義海豪情》無論收視及口碑均大豐收，祥仔同雯女更連續2年喺TVB台慶頒獎禮奪視帝及視后，今日雯女喺社交平台貼出《巾幗梟雄》敘舊，指劇集會拍完，但情誼卻永在。

原來「柴九」黎耀祥及「四奶奶」鄧萃雯噚日約咗已退休嘅監製李添勝，以及金牌編劇張華標飲茶相聚，雯女記得呢套劇開拍前，成日喺製作部七樓睇到添哥佢哋「爆腦」度橋，要喺有限時間趕出一個好劇本，雯女覺得「一劇之本」好重要，冇好嘅劇本就冇後來嘅好成績。

雯女好唔捨得添哥退休，因為佢係演員嘅定海神針，因為添哥有經驗、有擔當有魄力又有熱情，飲茶期間，佢哋講起共同經歷，雯女鍾意聽添哥同張華標講戲談見識同歷史，佢有幸跟佢哋合作兩套好作品，雯女表示：「雖然添哥退休，但聽得出他仍然對電視行業有心又有情。」

雯女覺得劇集會拍完，但情誼卻永在，佢回想12年前嘅《義海豪情》，至今觀眾仍念念不忘，作品被談論全賴監製同編劇對戲劇嘅理解，雯女續道：「有些戲拍完就只是過眼雲煙，自己都會忘記演過甚麼，但四奶奶與九姑娘的某些特質已成為我本人的一部份，也是我畢生難以忘懷的好角色。這兩部天作之合，是送給我人生的兩份大禮，所以非常感激。祝願兩位前輩監製李添勝，編劇張華標繼續健康、平安、無論工作享樂都龍精虎猛，事事順心！」