輝哥張兆輝日前喺社交平台上載跟陳妙瑛、向海嵐、杜大偉、敖嘉年及監製張乾文嘅新春聚會合照，五人因合作拍TVB經典劇《無頭東宮》而結緣，劇集播映至今已相隔21年，依然令觀眾印象難忘，五位演員保養得宜，凍齡有術，睇落跟20年前一樣。
當年TVB經典神劇《無頭東宮》播放後，陳妙瑛轉戰從商息影幕前，令「皇上」張兆輝、「東宮凌雲 」陳妙瑛、「西宮楚楚」向海嵐、「皇兒」杜大偉及「皇兒」敖嘉年呢個《無頭東宮》組合未有機會再次合作，但多年感情依舊，無礙佢哋友好關係，即使各奔前程仍保持聯絡，日前五人相約聚會嘅畫面，勾起不少觀眾童年回憶，今次原來係「細妹」向海嵐積極籌劃，而「大妹」陳妙瑛就安排地方兼請客。
由張兆輝、陳妙瑛、向海嵐主演嘅《無頭東宮》喺2002年播映，以「換面」為題，講述陳妙瑛與向海嵐因交換容貌，樣貌醜卻心地善良、樣靚卻性格刻薄，二人命運從此逆轉，題材詭異又創新，令觀眾留下深劇印象，當年成功爆紅掀起煲劇熱話，成為TVB經典神劇之一。
陳妙瑛拍完《無頭東宮》便淡出娛樂圈，並轉行從商，建立美容王國，杜大偉去年爆陳妙瑛有意拍劇，更透露對方曾心思思想客串數集《愛‧回家之開心速遞》，唔少監製曾向佢接觸，希望陳妙瑛回巢拍劇；事隔多載，至今仍有不少網民及觀眾講起《無頭東宮》，每次重播都引起觀眾追看，有網民推舉《無頭東宮》為最渴望重播嘅劇集；有人更留言問2023 年最令人期待嘅組合，有冇機會拍《無頭東宮2》！
