劉嘉玲Hilary馬爾代夫曬白滑美腿 皮膚細緻亮麗

劉嘉玲與梁朝偉於2008年結婚，近年嘉玲身兼老公經理人，幫偉仔接job，本身嘉玲又係忙過不停嘅人，近日佢忙裡偷閑約埋上山詩鈉、Hilary及弟婦Laura去咗馬爾代夫度假，嘉玲連日上載多張性感泳照。

相中見嘉玲身穿一件頭泳衣，身材保養極好，皮膚仍然細緻亮麗，加上海天一色嘅美景，令人目不暇給，嘉玲自從跟發哥周潤發行山後，佢開始熱愛行山、跑步及踩單車，堅持每星期運動至少5日，難怪保持好氣色，睇落更年輕。

另一張相就見嘉玲瞓喺吊床上，大曬一雙白滑美腿，舒適地聽住海浪拍打嘅聲音，享受陽光與海灘，嘉玲為咗唔曬黑，用帽遮住塊面，而好友上山詩鈉一向喜歡古銅色膚色，展現健康性感美。

此外，嘉玲同歌神張學友一向好老友，今日嘉玲喺IG貼出二人合照，原來嘉玲日前出席B哥鍾鎮濤70歲壽宴，與學友喺台上合唱《你最珍貴》，學友笑稱：「你玩吓好啦，唱歌唔適合你。」嘉玲反擊：「你唱歌好啦，演戲唔適合你。」學友即百厭回應：「係呀，我知呀，所以我放棄做戲囉，不過除咗喜劇，我適合做喜劇，哈哈！」不少網民紛紛留言，指學友其實係被唱歌耽誤嘅好演員，當中佢有份演嘅《男人四十》、《阿飛正傳》及《阿基與阿飛》，令觀眾留下深刻影響，覺得學友唱歌演戲都出色。