新四十二章丨陳豪凌晨拍「全裸」落水戲譚凱琪難忘捱凍

TVB熱播劇《新四十二章》噚晚劇情集中喺章經（陳豪飾）與Frances（譚凱琪飾）感情線上，章經無意中發現Frances妹妹患怪病，愛妹心切嘅Frances打蛇隨棍上要求章經影「假結婚相」，希望妹妹能安心。章經影婚照期間表現侷促，隨著與Frances到母校走了一轉、意外地救一隻狗，以及與Frances清晨落海暢泳後，二人感情發展一日千里……

Frances同章經講起患病嘅妹妹忍唔住眼濕濕，之後即興游「裸泳」。 Zoie落水前同上水後都做足保暖措施。網民大讚Zoie保養得宜，個個都以為佢只有三十零歲。 肉色上衣+下身打底
噚晚「Fran經」感情線甚有睇頭，除咗有型男美女婚照Look，二人落海暢泳情節相當吸睛，Zoie近乎背部「全裸」演出之餘，更因劇情講述陳豪怕Zoie被人「睇蝕」全相，故此喺海中攬實Zoie，相當親密。Zoie事後受訪時透露拍攝落水戲前做足打底功夫，呢場戲最難忘係「夠晒凍」，原來當日喺凌晨五點幾六點進行拍攝，因為一朝早未有太陽，仲要落水，譚凱琪真係有啲凍，而佢拍嗰陣有著肉色上、下身打底先至落水。

落水前嘅陳豪同Zoie都好掙扎。呢一幕睇到不少網民嘩嘩聲。陳豪呢個表情，一望已經想笑。當導演嗌Cut後，陳豪同Zoie一秒破功，笑到停唔到。

陳豪與Zoie為咗呢場落水戲，喺深夜時間已於海灘等候埋位，陳豪帶住「受死」心情落水，全程表現「冇眼睇」，Zoie則不斷傻笑掩飾緊張，又向工作人員透露已煲定薑茶暖胃，陳豪聞言即搞笑謂：「希望我拍完仲有知覺。」噚晚有唔少搞笑位均落喺陳豪身上，尤其衫褲被偷後要拎Zoie外套遮著重要部份「逃」回住所一幕，令唔少網民拍案叫絕，並大讚陳豪謂：「陳豪的確有喜劇感，冇其他小生做到佢效果。」

呢幕游水戲昨晚引發咗唔少討論。陳豪「逃」走番屋企個樣，又係喜感十足。二人嘅婚照Look甚有型男美女Feel。
呢幕Lisa變Liza姐，網民紛紛留言話笑爆嘴。陳豪係想要Blackpink嗰個LISA!

網民激讚游游學生Look
噚晚另一特別位係「無綫御用情侶」林正峰及游嘉欣再度合體飾演兩小無猜同學仔，先後喺《香港愛情故事》、《青年心城之撐起青春》、《青春不要臉》、《美麗戰場》及See Saw先嘅網劇中有「峰欣」感情線，連當事人都數唔到呢次係第幾度演情侶。林正峰飾演章經學生版，游嘉欣則飾演梁子涵；梁子涵暫時並非劇中重要角色，但到底會唔會又係隱藏人物則有待下回分曉。

游游同林正峰再度演情侶，網民都話佢哋係TVB御用戀人。
噚晚正峰與嘉欣齊齊以「學生Look」上陣，不單止大晒童真玩猜謎語，又「文青」上身大鬥詩詞歌賦，並為「夕陽」與「明月」糾纏不休。正峰受訪時笑指是次拍攝十分開心兼青春：「因為可以著住校服喺中學出現番，做番啲中學生做嘅嘢，覺得幾好feel同好有青春活力。」正峰笑指與嘉欣「情侶檔」一啲都唔悶，並希望觀眾唔會覺得生厭：「我同佢演情侶好處係大家已經有一定默契，一嚟就知大家會點演，或者傾嘅時候好易夾到。」

游游校服Look同Gfable表情贏盡好評。

至於游游笑稱由於與正峰合作演情侶次數太多，已經數唔出係第幾次合作：「今次係情侶mood shot多，一講對白就唸詩，令我諗返起以前返學背書，緊張咗成日。因為場戲係日落嘅時候拍，我好驚我背唔出會影響咗大家，所以我由收到劇本嗰日起就係咁背，仲默埋出嚟。」游游又指現時只要聽到「明月」、「燐光」呢幾個字便有陰影，相當搞笑，對於游游嘅校服Look，網民一致好評，並大讚校服游游勁Pure勁True。

陳豪個期待樣又係勁搞笑。