新四十二章丨總舵主 vs Mon姐爭柯仔？衛志豪難忘爬粗鹽山醃到手損

由陳豪、龔嘉欣、周嘉洛、鄺潔楹等主演嘅TVB《新四十二章》，噚晚（16日）劇情再有推進，章經（陳豪飾）幾經苦思下終解開手持6頁紙「數字密碼」，並發現每頁紙側邊原來暗藏玄機。另一邊廂螢嬌（龔嘉欣飾）與哥哥朱古力（林景程飾）及朱若望（易宇航飾）夾計試探Ronald（吳子冲飾），揭穿Ronald接近阿嬌另有目的，此時臥龍幫突然殺到。

阿嬌被拮暈後，慘被帶到實驗室嚴刑拷問，經過多次電擊再次暈倒……至於一班年青演員江嘉敏（Mon姐）、周嘉洛（柯仔）及糖妹（總舵主）繼續負責搞笑，柯仔與總舵主同為電單車發燒友一見如故，令Mon姐變成大大粒「電燈膽」。

《新四十二章》劇情輕鬆，角色獨特造型亦為網民津津樂道，當中以總舵主嘅「七彩」造型最為吸睛。其實糖妹出場時已因珠珠耳環惹起關注，有人更從中推斷糖妹另一維度身份；亦有細心網民發現糖妹每次出場有唔同色Tone：黃色、橙色、紫色及藍色等，除咗下身上身襯到絕，內外色tone十分夾，配以奪目彩虹Boot，著實搶鏡。糖妹呢身打扮嘅幕後功臣，就係喺TVB服務多年嘅服裝指導Phoebe，先後炮製多個令人深刻嘅角色造型，包括《殺手》龔嘉欣，以及《七公主》結局中嘅搶眼彩蛋Look。

Phoebe坦言今次再合作聽咗阿Joe介紹角色後，腦海即有各人造型：「多謝網民留意到，每個造型都真係花咗好多心機，希望可以令觀眾覺得煥然一新，同記得藝人呢個Image，今次所有造型都係佢哋以前未試過嘅。」談到糖妹嘅「七彩」造型，Phoebe透露經過多番構思及找尋，最終決定以民族圖案披肩改裝成短外套，並以闊褲為主，方便糖妹拍打戲：「我希望有少少性感，但又唔可以太暴露。」Phoebe續指由外套到內搭到闊褲到頭巾到耳環甚至鞋襪，都係根據每個場口需要用心搭配。

衛志豪（Michael）飾演臥龍幫成員，造型亦相當獨特，臉上咗白蝕妝更係暗藏劇情密碼。Michael曾喺社交網透露呢個造型，由set頭至化白蝕妝每次至少花上兩粒鐘。衛志豪喺劇中打戲連場，武功同樣贏盡正評，問到首拍打戲難度，Michael說：「呢套劇我冇乜對白，唯一多啲對白就係問功課嗰場，其他全部都係打，打到周身傷，手腳成日都會撞瘀，都係盡力啦。」Michael又指最難捱唔係打戲，而係爬「雪山」：「啲雪係用粗鹽扮嘅，咁我要爬過啲粗鹽，我估唔到啲粗鹽會整到我隻手損晒，同埋令膝頭好痛。」