74歲歌神許冠傑（Sam）將於今年4月7至12號開紅館演唱會，歌神近日忙於為演唱會進行排練，大會更搵咗曾與許冠傑合作過嘅好友，拍攝短片《許冠傑與我》講吓對阿Sam嘅感覺，光頭神探麥嘉當然係許冠傑嘅「最佳拍擋」，片中見麥嘉精神奕奕，說話時中氣十足，麥嘉明顯比當年瘦削嘅身形，目前睇落成個人精神飽滿。
麥嘉佩服「最佳拍檔」得天獨厚、打得唱得，而且Sam從未抱怨過辛苦，永遠充滿魅力，好享受演出過程，又指Sam一向享受拍戲嘅過程，而唔係結果，每次開演唱會，Sam均搏命表演，享受唱出每一首歌及歌曲細節，同埋演唱會嘅過程，佢亦祝歌Good Show！
麥嘉繼早前已亮相香港電影金像獎頒獎禮，與黃百鳴做嘉賓，佢嘅光頭佬look依舊搶鏡，麥嘉喺大學時期主修電子工程，後來喺電話公司擔任工程師，由於麥嘉熱愛電影，毅然辭職走咗去讀紐約大學電影系，主修電影製作，1973年正式投身電影圈，麥嘉與黃百鳴、石天創立新藝城電影公司。
除咗做幕後製作，亦有幕前演出多齣賣座電影《追女仔》、《最佳拍檔》系列等，電影《最佳拍檔》喺1982年創下票房勁收2700萬，為香港電影史上首部票房突破2000萬嘅電影；麥嘉更憑出色演技，榮獲1983年香港電影金像獎「最佳男演員」，隨着新藝城結業，麥嘉淡出娛樂圈，轉投地產行業，有傳其將大半身家投資，險些破產，幸好喺朋友幫助及家人陪伴下，走出困境，近年麥嘉鮮有露面，生活非常低調，2016年曾參演由洪金寶主演嘅《我的特工爺爺》，另外，石天於2021年因癌症病逝，為悼念故友，施南生相約新藝城兩位巨頭麥嘉及黃百鳴，泰迪羅賓、曾志偉、張艾嘉聚餐，難得露面嘅麥嘉外形幾乎冇變。