已經好耐冇喺香港螢幕見過觀眾嘅郭少芸，近年專注喺內地發展，仲分別喺順德同杭州置業。日前佢就拍片，以「53歲女演員在杭州宅家一天的花銷」為題，分享自己喺屋企一日使費。
着住V領冷衫嘅郭少芸，早上先為自己買嚟一束價值200蚊嘅紅玫瑰，將佢插好喺花樽之後，仲表示生活中係需要有儀式感。之後佢就着手自己嘅早餐，笑言要對自己好啲嘅郭少芸，見佢嘅早餐有生果、咖啡同花膠，相當滋補。
享用完早餐後，就有乾洗店嘅職員送嚟佢之前拎去乾洗嘅衫，而費用就要成500蚊。唔少網民睇到呢度，都話乾洗費太貴，都可以直接買幾件新衫喇。
雖然係宅喺屋企，但郭少芸仍然會為自己打扮一番，所以佢就搵嚟專人上門幫佢整指甲，之後又搵嚟私人補習老師幫佢補習普通話。至於午餐同晚餐方面，郭少芸都係揀食外賣，午餐就食咗價值100蚊嘅減脂餐，而晚餐就享用300蚊嘅椰子雞煲。
片尾郭少芸粗略計一計自己呢日嘅使費，就總共用咗2040蚊，計完之後佢仲話呢個數都可以，所以就繼續上網購物，令到一眾網民都歎女明星嘅生活成本好高。
其實轉攻內地嘅郭少芸，近年嘅發展都可以話概當順利，除咗密密接商演外，又會做下直播帶貨。而早前佢趁住開關，就返咗嚟香港探媽媽兼過年，仲拍咗唔少片介紹香港美食、去旺角買波鞋、帶觀眾參觀電視城等。
