布偉傑（阿一）噚日喺抖音上載影片，稱自己與結婚5年嘅化妝師老婆Celia離婚，正式結束第二段婚姻，布偉傑剖白離婚，見佢明顯有啲眼腫，原來佢啱啱正式離婚，佢坦言至今仍未搞清楚離婚原因，阿一續道：「我哋去申請離婚嘅時候，嗰日朝早搞掂啲手續，去咗食早餐、食完早餐去睇場戲，跟住食午餐，跟住一齊做義工，食晚餐，跟住講ByeBye，各自返自己屋企。」
布偉傑透露因疫情影響，自己經濟開始不穩定，司儀及拍戲工作完全停頓，佢猜測係因為呢個壓力，導致生活模式改變，令Celia提出分開做回朋友，布偉傑得知分訊，有啲難以接受，佢眼泛淚光表示：「開頭我唔接受，我知道有問題，但係我好想解決問題，佢講嗰晚，我喊咗成晚。」布偉傑更指如果Celia搵到男友，又或者要結婚，佢都衷心祝福前妻。
布偉傑經歷兩段婚姻均離婚收場，1994年喺波士頓一間快餐店結識比佢年長兩歲嘅女子，冇耐二人便閃婚，婚後育有兩名小朋友，直至2003年離婚，回復單身嘅布偉傑，後來認識化妝師Celia，佢哋拍拖3年，布偉傑於2016年求婚成功， 2017年5月20日在美國迎娶女友，同年於在港補擺喜酒筵開28席。