以破格法庭題材加入新年賀歲檔嘅《毒舌大狀》，自大年三十開畫之後，上映32日多次打破票房紀錄，到2月底下號仲創下歷史性一刻，截至傍晚6點，《毒舌大狀》香港票房累積達$100017474，衝破一億大關。《毒舌大狀》穩坐港產片No.1之餘，亦係史上首部破億港產電影。
電影台前幕後就指，全賴巿民熱烈支持入場睇戲，先可以共同為香港電影寫下歷史新一頁，佢哋更感謝廣大觀眾支持，希望香港電影業繼續百花齊放。
一班演員亦分享終於打破港產片未能破億嘅歷史，導演吳煒倫話從冇諗過有一億票房，亦冇估計到咁短時間可以衝破紀錄。佢話：「不過紀錄唔係用嚟keep，而係要打破嘅，我希望快啲有下一部港產片打破紀錄。」
主角 黃子華 亦感謝觀眾賜出一億，佢話：「對我個人嚟講就好像執到一張中頭獎六合彩，甚至張飛唔係自己買，自己買或者覺得應份。感覺就好似個天飄落嚟，飄到手上中獎一樣，又好像去咗火星咁，都係要多謝大家賜俾我哋咁奇妙嘅感覺。」
謝君豪則話：「喺香港電影票房出現一個億字，其實以前真係諗都未諗過，電影要入戲院睇，即係等於舞台劇要入劇院睇一樣。」女主角王丹妮就話：「好犀利！好開心自己能夠喺呢個夢工場入面，能夠同咁多好演員一齊拍呢部好電影。」
