集合六大視帝視后：馬國明、陳山聰、陳展鵬、江美儀、唐詩詠及劉佩玥主演，以警隊入面嘅反恐特勤隊(CTRU)同神秘部隊—隱形任務戰略部隊(POTT)點樣攜手協力但又明爭暗鬥偵破多宗大型案件為故事骨幹嘅新劇《隱形戰隊》，將於3月6號播出。
劇中飾演 CTRU 戰友嘅簡曜洋(簡 Sir、Ocean 馬國明飾)、喬寶寶(唐詩詠飾)、顧家強(Cool Sir 陳 山聰飾)同埋喬帶囡(囡囡 林子善飾)，因為一粒子彈決裂，之後又因為種種原因再次聚埋一齊。
雖然今次喺馬國明同唐詩詠第5次飾演情侶，但有別於過往嘅係，今次佢哋係演一對過氣情侶，一見面就會鬥嘴，互相以「人渣」、「死八婆」嚟叫大家。而詩詠亦都係一改以往溫柔斯文嘅戲路，飾演一個毒舌頭腦型女警，性格MEAN爆、潑辣兼鍾意打橫嚟講；至於佢嘅「前度」馬國明嘅角度性格，除咗熱血內斂嘅專業外，仲加多咗份不擇手段嘅「流氓」特質，聽起嚟頗有新鮮感！
喺《隱形戰隊》嘅預告片入面，除咗有必備嘅槍戰同肉搏場面，仲有「雙劉」劉穎鏇同劉佩玥曬長腿同功夫！而劇中一眾主角更加係玩槍玩到出神入化，當中陳山聰喺預告片尾以秒速撥走心口同背脊前後兩支槍嘅一幕，更加令人嘆為觀止。
《隱形戰隊》3 月 6 日起逢星期一至五 20:30 翡翠台
