黑客動作犯罪電影《斷網》於3月9號隆重上映，由鄭保瑞監製、黃慶勳執導，演員陣容鼎盛，包括有金像獎三大影帝郭富城、林家棟及任達華坐鎮，譚耀文、黃德斌、賴雅妍、胡子彤、顧定軒及湯怡等主演，電影講述黑客以驚人速度及技術入侵國際金融機構，郭富城及林家棟飾演網絡專才，任達華飾演網絡安全調查科督察，與佢哋穿梭網上與現實世界，互相角力鬥智鬥勇，展現非一般警匪網絡戰。
今日發佈三大影帝特輯可見，三位影帝難得同場鬥戲，郭富城搏命演出動作戲，險象環生，事實上《斷網》不單止講述網絡犯罪嘅電影、富有CG特效之餘，更係雲集飛車、爆破於一身的動作戲。城城喺戲中飾演卓家俊，係一位網絡保安經理，負責設計防火牆，不過城城今次跟飾演網絡保安公司行政總裁陳明志嘅林家棟形成對立面，二人要挑戰喺極狹窄細劏房中進行高難度打鬥戲，此為其中一幕較難處理嘅戲份。城城與家棟同樣表示兩人早喺《寒戰》曾合作過，又會喺休息時不停探討劇情、人物角色上嘅設計，務求為觀眾帶出更多驚喜。另外，飾演網絡安全及科技罪案調查科督察嘅任達華，亦表示拍攝時非常流暢且愉快。
戲中城城相當賣力演出，需要拍攝多類型嘅動作場面，又要喺中環鬧市拍攝追逐戲，更慘被強行拖落樓梯，存在高風險受傷嘅可能，城城仍然堅持親身上陣，非常敬業。當中兩場令觀眾睇得心驚膽顫嘅動作戲於中環大館取景，更係大館喺疫情之下首次開放給予電影拍攝，當時城城由一樓跳到地面，中間撞到一個攤檔再跌下地面，再往外逃跑，對佢嚟講並冇一場係輕鬆便完成嘅簡單戲份。
電影團隊特意喺大館中央擺設一個紅色竹支砌出來嘅棚架，城城為躲避歹徒追捕，不惜攀上高處與其搏命，喺竹棚之間穿插之餘，更從頂處高速滑到地面，過程險象環生，片段亦可見城城每拍完一take都大汗淋漓，城城直言：「拍攝時被人扯住一隻腳往下拖跌下地面而受傷，的確拍到遍體鱗傷，不過現場工作人員都非常關心我即時問我『有冇事啊？』，不過我覺得拍出來的效果相當之好，所以由心感到值得，希望大家會喜歡。」
《斷網》講述
電子螢幕背後藏著一片詭秘的網絡森林，滿佈光纖與數據，係孕育技術與滋長病毒嘅奇幻空間……黑客們喺網絡森林播毒，發動一次大規模嘅網絡襲擊，幸得天才網絡保安主任卓家俊（郭富城 飾）利用自身研發的防火牆，化解危機。殊不知病毒攻擊原來是由其上司陳明志（林家棟 飾）所操控，家俊亦因此誤墮其洗黑錢圈套，陷入險境……
為證清白，家俊與陳明志展開激烈鬥法。家俊暗中在網絡森林煉製具備人工智能（AI）的超級病毒，更不惜游走危險領域 - 潛伏並攻擊各路黑客，誓要搵出陳明志罪證，同時陳明志不擇手段，命令黑客反奪家俊手上解密科技，更綁架其女兒卓寶兒及恐嚇其妻子詠珊（賴雅妍 飾）。家人生命受到威脅，家俊受盡掣肘，更禍不單行的是，其研發嘅AI病毒失控，迅速竄入各個電腦系統，瞬間全城斷網，引起莫大恐慌，後果不堪設想……
