四大名廚 Christian楊尚友、Gabriel蔡家富、Margaret徐蒝 同 Justin陳希裕聚埋一齊搞咩？咪就係為最後一集嘅《奇蹟的罐頭料理》，以鹹牛肉同五香肉丁罐頭炮製超乎想像嘅派對美食囉！
當中有以粟米罐頭整嘅「西米布甸」、罐頭辣椒炮製嘅「墨西哥辣椒朱古力蛋糕」、以煉奶溝出嚟嘅彩色醬汁伴香蕉薄餅，當中Christian以鹹牛肉加麵粉做成外皮製作嘅「鹹牛肉乞衣雞」，更加係獲得一致好評。
而《罐頭》小劇場環節，喺「結局周」新登場嘅Carmaney黃嘉雯，以一襲紅色貼身裙相當亮麗，劇情中佢慘遭飾演疑似變態佬嘅Liam馮子亮眼神騷擾，而Carmaney更係怒請對方食「無情掌」。
問到Carmaney現實生活中有冇遇過色狼？佢話：「有一次搭港鐵，喺反光鏡見到有個男人偷影我，之後我直接行過去話：『你偷影我』，但佢死口話冇，我就話我明明見到，之後我就叫佢delete咗張相，當時我都幾大聲，因為我想引起大家注意，畀多啲壓力佢！我以前未做藝人前會直接行過去對質，但入咗行之後會深思熟慮多啲。」
拍完劇集《下流上車族》後，工作量慢慢增多嘅Carmaney，而家除咗有拍節目《Blah Blah BLAH試新室!!》同《開壇》外，最新仲有份演出劇集《廉政狙擊》，瓣數多多嘅Carmaney直言主持同演員嘅工作佢都鍾意：「因為係唔同嘅挑戰，主持可以Show到我多啲個人性格，同埋好考臨場反應，演員就要做好多準備功夫，好似訓練、讀劇本咁，難度比較高。」對於要為J2全新綜藝節目《超級毛特兒大賽》擔任主持，Carmaney坦言因為係佢第一次完全冇稿嘅情況下做司儀，佢話冇辦法預計到會有咩突發情況，只可以叫自己盡量放鬆同Enjoy。
《奇蹟的罐頭料理》星期五 20:30 最後一集 J2
