如演員早前宣傳所言「死得人多」，更盛傳將每集會有一個角色死亡嘅《新四十二章》，24號一集 劇情講述施單( 衛志豪 飾)因為食咗天山雪蓮令臉上白蝕蔓延，唔止全身皮膚變白仲一夜白髮，功力同時亦大增。
施單因為受Frances( 譚凱琪 飾)「誤導」搵螢嬌( 龔嘉欣 飾)報仇， 但係同阿嬌大打一輪後先發現被騙，於是轉移目標搵Frances報仇，其間誤傷章經（ 陳豪 飾），仲死於Ronald（ 吳子冲 飾）同白衣戰隊嘅亂槍掃射。
Michael今次雖然飾演反派，不過由於角色性格單純、忠直有義氣兼戇直，加上每場打戲交足功課，成功獲得唔少正評，唔少網民仲話唔捨得施單角色離世呀。對於網民同觀眾讚好，Michael就話要感激監製賜予角色同大家支持喇。
佢話：「拍呢套劇係真係辛苦嘅，最後嗰個白化造型，由頭到腳上妝要成三個幾鐘，落妝要係咁捽係咁捽，都係咁甩皮，但就係因為個造型咁突出，觀眾先有記憶點， 所以好多謝監製咁有心思。今次真係打得暢快，雖然辛苦受傷在所難免，但出嚟效果好乜都值。」而同場嘅「神槍手」Zoie，亦獲讚有型又有款，仲有觀眾話希望佢將來可以向動作戲發展。
呢集嘅搞笑位就落喺另一維度身份係公公嘅一算( 鄭子誠 飾)身上，佢為開啟潛藏武功扭盡六壬嘅身份，遇上醉心研究武術嘅「電腦奇才」勝基（ 譚永浩 飾）， 可惜辛苦得來嘅武功秘笈原來係假貨，心有不甘嘅勝基之後帶一算殺上天台「飛越十八層」企圖逼出潛能，一算竟得償所願一飛衝天鶴立電橙柱，有樣學樣嘅勝基就嚴重跌傷送院，劇情貫徹天馬行空作風。
由於演出極有默契兼極度搞笑，觀眾大讚子誠之餘六讚永浩有喜劇感，但係其實呢集只係子誠嘅一個開始，佢喺下星期展開嘅結局周將冋江嘉敏仲有鄺潔楹等人打到飛起，仲有空中翻騰絕技。
子誠就話自《超時空男臣》後已多年未吊過威吔，但係相比起同劇嘅後生女演員，自己上陣嘅只係小兒科：「江嘉敏、糖妹同龔嘉欣佢哋吊到天花龍鳳，我只係吊上吊落，佢哋又打橫又轉圈又盛，我真係搞唔掂。」子誠仲話自己屬手腳唔協調類型，經常激暈武指：「我冇乜武術根底，如果要打功夫，我次次都係激到啲武指生蝦咁跳，好簡單嘅動作我都冇台型出到嚟。拍動作戲亦算係挑戰我體能極限，年紀大咗個極限真係愈嚟愈低。」