24號晚播出嘅一集《廉政狙擊》當中，ICAC臥底同各大集團嘅高層人物一齊聚首雍華盛薈派對，劇中嘅一眾女角都以華麗打扮登場。其中以低胸喱士裙上陣嘅 羅霖 雖已58歲，但係除咗皮膚狀態好到不得了之外，身材亦保養得宜，魅力同現場其他女藝人分庭抗禮，好似前港姐亞軍 陳楨怡 嘅火辣低胸紅裙、 蔡思貝 嘅青春露背裝、 陳庭欣 同 莊思明 嘅超Deep V晚裝等。
而女主角屠敏( 胡定欣 飾），就以一襲喱士中空透視裝現身，性感之餘同時相當有氣勢， 可謂搶盡風頭。對有網民大讚佢有壓場感兼擁大家姐風範，定欣就笑言私下嘅自己唔似角色咁強勢喇：「如果當刻有人比我更有決定能力，咁做決定嗰個就唔係我。」
其實屠敏背後暗藏悲慘過去，喺意外中失去一雙方隻腳嘅佢，23號晚一集被 洛子峰( 黃宗澤 飾)意外發現喺房間穿戴義肢，不欲身體缺憾被外界得悉嘅佢怒極掌摑子峰。
製作組亦公開相關花絮片段，戴住綠色腳套拍攝義肢戲份嘅定欣，要花大量時間同工作人員研究拍攝角度，部份場口要屈起膝頭拍攝，務求拍出配合CG嘅最好效果。
定欣受訪時透露，雖然因為角色性格關係，無論跑步同走動都唔需要展現行動不便一面，不過細節上依然花咗唔少功夫，要靠觀察殘疾運動員同義肢替身嘅生活日常，令角色更真實：「因為一啲起身坐低嘅動作，戴住義肢嘅人，始終都會流露少少唔自然。」
以往拍過唔少掌摑戲嘅定欣，對要掌摑Bosco就笑言：「每次拍呢啲場口，都希望可以盡量一 take過，唔好出錯等對手唔好受咁多掌。」
41嘅歲定欣喺劇中飾演 方力申 繼母，合乎情理但仍引發熱議，定欣就話十分有趣喇：「其實我同小方十幾歲時，大家未成為藝人、讀書年代已經認識，去到今次真係第一次合作做對手戲，仲要係一個咁樣嘅關係，個感覺幾特別，有啲唔係好慣。」佢又話最唔習慣是要面對「叛逆」 版小方：「因為廿幾年前我認識嘅佢，唔係一個咁嘅小方。今時今日我眼前嘅佢，無論戲外戲內都已經好唔同。」而小方亦喺社交平台Post當年同定欣嘅珍貴合照：「我第 一次入電視城做觀眾，就係支持定欣參加《全球華人新秀歌唱大賽》。」
《廉政狙擊》星期一至五晚21:30 翡翠台