生前活躍於時裝界嘅名媛 蔡天鳳 日前失蹤後，爆出轟動全港嘅命案，蔡疑被前夫一家有預謀殺害。據指蔡父母從商，本身家底不俗，與前夫離婚後仍保持良好關係，更安排豪宅予前夫一家居住，兇案懷疑係因為錢債糾紛引起。
事發後一直未有現身嘅涉案姓鄺前夫，星期六據報喺東涌準備潛逃時被捕，而警方星期六亦到將軍澳華人永遠墳場搜索疑被棄置嘅遺體殘肢。西九龍警區重案組早前已拘捕涉案嘅前家翁、家姑同大伯。有指65歲嘅前家翁曾任職警長，2005年疑因事被離開警隊，而據報道指前家翁正係案件主謀。
蔡天鳳同鄺姓前夫育有一對10歲同8歲嘅兒女，事發後據指將交由外婆照顧。
蔡天鳳不時被邀請出席各大品牌嘅時裝騷，佢更經常出現於唔同時尚雜誌上，早前蔡天鳳就曾成為一本法國時尚雜誌嘅封面人物，並被形容為「時尚指標」，指蔡天鳳擁有敏銳嘅時裝觸覺，將會成為風靡全球時裝界嘅一大影響力。
除咗有時尚觸角，蔡天鳳亦同唔少圈人稔熟，當中天王嫂方媛更係佢閨密之一，不時會一同聚餐，亦曾互相慶祝對方生日。
