請1日假去旅行丨攻陷港人旅遊熱點周奕瑋陳嘉慧推介東京潮點麥美恩戴祖儀玩盡首爾

TVB全新旅遊資訊節目《請1日假去旅行》將於3月2日起、逢周四及周五晚上10時30分於翡翠台播映，隨住全球旅遊限制鬆綁，香港人熱愛旅遊嘅心亦蠢蠢欲動，凡事講求效率嘅香港人，Work Hard Play Hard，《請1日假》貫徹香港人旅遊精神。

周奕瑋同陳嘉慧兩大日本通合體，非常合拍。
第二組出發嘅主持係麥美恩同戴祖儀。

八大主持以「打工仔」心態出發，實踐「請一日假」自製Long Weekend，整個行程將用盡每分每秒兼用最平民價錢，過一個喪玩、喪食、喪買嘅「真．三日兩夜」旅行，CP值爆錶！八大主持將分成四組，分別出發玩盡四個港人最愛旅遊熱點，包括「東京篇」周奕瑋＋陳嘉慧、「首爾篇」麥美恩＋戴祖儀、「曼谷篇」李芷晴＋何沛珈及「台北篇」余思霆＋金剛。

周奕瑋同陳嘉慧由搭飛機起程一刻已大派貼士。周奕瑋同陳嘉慧慳住遊勻成個東京。
推介東京新興景點
首周出發嘅組合係周奕瑋（Jarvis）＋陳嘉慧（Erica），兩大「日本通」帶大家玩盡東京，由搭飛機起程一刻已大派貼士，例如一定要揀左邊窗口位，皆因該位置可於降落前約20分鐘見到富士山，啱晒打卡！東京行程非常緊湊，Jarvis及Erica一落機就教大家買Skyliner套票，內附一張東京地鐵48小時乘車券，期間可以不限次數乘搭地鐵，慳住遊勻成個東京；兩人今次更會走訪東京近一、兩年新興景點，包括銀座甜品街、及澀谷宮下公園等。美食方面當然不能少，兩人大歎超抵食Omakase及和牛放題等，絕對平靚正！

周奕瑋、陳嘉慧帶大家玩轉東京。周奕瑋同陳嘉慧係咁影靚相。
似拍日劇多過旅遊節目
「日本通」Jarvis受訪時直指東京近年多咗好多新景點：「以東京為例，澀谷已經有好多新去處、新商場，所以今次喺節目入邊，我哋都會主力同大家介紹喺封關呢幾年開咗嘅新地方，等大家有一個Update啲嘅日本行程規劃。」講到與Erica合作，Jarvis笑言好舒服：「因為大家識日文，有時同餐廳老闆傾偈，或者喺當地發現啲得意嘢，大家一睇就知道，唔需要翻譯，所以可以玩得更加盡興。」Jarvis爆料指Erica睇《First Love》上晒腦：「Erica去到唔同嘅地方都捉住我拍片扮《First Love》，搞到今次明明係拍旅遊節目，但我覺得好似變咗拍日劇。」

麥美恩同戴祖儀掃街嘆美食。兩個「是非精」合體，齋睇相都覺得有聲。麥美恩戴祖儀玩得盡興
至於第二組出發就係麥美恩（Mayanne）同戴祖儀（Joey），兩位「是非精」喺首爾玩得十分盡興，拍攝期間不時喺社交網上載花絮照，包括朝聖打卡Café、大歎街頭美食等，兩人更獻出「第一次」汗蒸幕及穿韓服，相當Enjoy。