中年好聲音｜支嚳儀騷味《愛情陷阱》獲91分 龍婷鮑大人失準被罰入校長室

歌唱節目《中年好聲音》踏入第五部曲次回合：《譚校長金曲！爭入12強！》，15位選手輪流獻唱譚詠麟金曲爭取進入12強。而是不是號播出一集當中，表現最佳選手，絕對係上一集被譽為「顏值擔當」嘅 支嚳儀（Venus）。

Venus自上集同 涂家堯 合唱《Endless Love》 獲得85分嘅高分後愈戰愈強，呢集獻唱迷幻版《愛情陷阱》大晒唱功同女人味， 加上以自創英文歌詞配合，最終獲得91分成全晚最高成績選手。

譚校長聽完之後大讚Venus表現：「目不暇給， 睇都睇唔切！」而出名要求高嘅伍仲衡，仲激罕俾出18分高分，又大讚Venus性感。 獻唱《小風波》嘅 周吉佩 表現平穩獲得83分，原來吉吉選唱歌曲背後原因勁有愛，佢話：「我同太太有好多起起跌跌，喺太太生第二胎之後，曾經鬧過一場好大嘅交，差啲去到婚姻(離婚)邊緣，所以唱呢隻歌係諗住同佢講，我哋會有將來。」之後又即場再向太太Say Sorry，鬼馬嘅校長見狀就唱住話：「你頭先講咗Sorry，你就有好日子～」場面搞笑。

而新婚嘅伍仲衡就自爆係校長鐵粉，為見校長一面，即使同太太度蜜月仍改機票提早趕返港見偶像，非常有心。佢聽完吉吉嘅《小風波》後仲乘機向偶像「示愛」：「你就話聽Air Supply，我未聽過Air Supply版本，我聽譚詠麟架喎！」

呢集8位選手完成比賽後，共有4位選手被叫入「校長室」(即危險區)，分別係同樣得77分嘅 龍婷 同 曹敏寶 、70分嘅鮑聖光同67分嘅魏嘉信。又以身為大熱嘅「小龍女」龍婷最令人跌眼鏡，獻唱《水中花》嘅佢笑言見校長緊張到腳震，肥媽話：「佢已經改善咗冇笑住咁唱，但就冇咗個起伏。」

而校長則話：「覺得你好穩陣，但今次前面開得死板咗，首歌嘅拍子係好平穩，但如果仲好粒粒咁唱住落去，就好似釘書機咁釘落去。」校長又即席示範非釘書機唱法，大顯功架。

至於「鮑大人」鮑聖光挑戰高難度獻唱《忘不了你》，但係就被指唱唔出心噏感覺，僅獲得70分，鮑大人喺台上直言非常喜歡校長，仲一度哽咽話：「有啲歌我聽校長唱，係會流眼淚， 但我點解會喊呢？我又講唔出喎。」

而校長聞言就爆料話：「曾志偉都係咁樣，我每次唱 《一生中最愛》佢就會喊，我都唔知點解佢會喊。」之後校長續爆唱《忘不了你》趣事： 「阿驄(林敏驄)寫呢隻歌畀我時，佢畀我嘅歌詞係手寫嘅，最後嗰句唔知係咪有眼淚滴咗落去，忘不了你個『不』字變咗個『七』字。」又自爆當年錄音時為唱出心噏味，特登空肚飲酒「進入狀態」：「呢隻歌好難唱，通常我錄歌一兩個鐘頭就走得，點知呢隻歌由2點唱到6點，後來空肚飲咗4分3支拔蘭地…就係你哋聽到嗰啲。」