黑客犯罪電影《斷網》於3月9號正式上映，新片除咗有三大金像影帝 郭富城 林家棟 同 任達華 坐陣之外，加上 譚耀文 黃德斌 賴雅妍 胡子彤 顧定軒同 湯怡 等人主演。 電影講述黑客以驚人速度同技術入侵國際金融機構，飾演網絡專才嘅郭富城同林家棟，仲有飾網絡安全調查科督察嘅任達華，穿梭網上同現實世界角力鬥智鬥勇。
除咗城城嘅動作戲之外，電影製作團隊仲花費2000萬港元製作大型CG網絡世界同喺南生圍森林拍攝。負責視覺效果指導嘅 林駿宇 就指：「戲中所有操作喺真實世界實際運作起嚟，肉眼完全睇唔到，監製想設計出一個真實場景，令觀眾同時擁有視覺享受。所以我哋將網上交易、防火牆、流動病毒『實體化』增加刺激感。」
美術指導 利國林 就話：「好似每次轉帳咁，按鍵不出半秒就匯走一百萬。問題在於點利用一個十幾秒嘅畫面去完整交代，又表達出唔想被追蹤到交易痕跡嘅畫面，令觀眾更加投入，知道整個網絡世界每一步運作。」
由於要令觀眾簡單分辦出戲中人物身處嘅環境，團隊特意喺視覺效果著手令觀眾更易投入。美術總監 文念中話：「演員會戴上一種透明反光面具，面具上再加入一啲數碼元素，可以加強數碼世界的感覺。」佢仲話拍攝團隊喺南生圍森林中取景，用以扮成網絡森林，將實景同虛擬效果結合，呈現出超現實效果。
製作特輯中城城嘅暗網虛擬身份造型亦曝光，佢戴住超現實反光面具，著上發光嘅有帽黑衣，非常神秘。加上畫面只得黑同白光表達陰暗效果同暗網嘅陰森。