流水落花｜Sammi新片首映不慎變崩牙Mi 陸駿光憶爭吵鬧交戲拍到虛脫

由 鄭秀文 陸駿光 同 談善言 主演嘅電影《流水落花》呢日舉行首映，以寄養家庭為主題嘅新片，呢日就同時相關機構合辦慈善首映禮，希望外界更為了解寄養家庭嘅細節。

Sammi就話希望大家可以透過電影，對香港提供服務嘅家庭同機構有更深入了解，而片中演出嘅幾位小朋友呢日亦都一齊現身現場。喺片中飾演角色非常壓抑嘅Sammi同陸駿光嘅關係亦非常緊繃，談善言仲對佢哋其中一場爭吵戲印象非常深刻。

佢話兩位主角雖然係有大爭執，不過又各自都非常壓抑自己，而Alan就話當時先後因為鏡頭位置已拍咗成6次，仲話情緒咁激烈嘅戲份對演員體力係好大考驗呀。

戴住口罩受訪嘅Sammi，呢日仲講到自己因為食嘢咬崩牙，又趕唔切即時補牙，所以惟有戴口罩做訪問，雖然唔影響食嘢同唱歌，不過就話以後食硬嘢會小心啲喇。

王丹妮 呢日都有現身首映禮欣賞新片，講到《毒舌大狀》票房大破紀錄，之前應承會找數露美腿嘅佢，就話幾位女演員日日睇住票房係咁升條數都唔知點找呢條數先好呀。