自從黃偉文搬咗去英國住之後，每次有歌手、名人英國、法國，都會順道去探一探Wyman同佢敍敍舊。呢日Wyman就喺社交平台上，分享有位稀客 — 阿Sa 蔡卓妍 去咗英國搵佢食飯。
Wyman話收到對方約食飯嘅短訊時，第一下反應仲以為係騙案，原因係Wyman話幫阿Sa寫咗廿幾年，呢次係第一次同對方單獨約出嚟食飯。Wyman笑言當年大家都仲係香港住，距離咁近嘅時候唔約，反而而家自己去咗英國住，先嚟呢次單獨約會，相當有趣。
講得係飯敍，當然要傾下偈講下近況啦，但Wyman同阿Sa似乎係有講唔完嘅話題，所以呢餐飯一食就食咗成7個鐘，認真誇張！雖然食咗成7個鐘，不過Wyman話飯後自己都忍唔住諗，如果餐飯係喺阿Sa 19歲嗰年約，佢哋餐飯嘅長度好大機會只會得45分鐘，Wyman慨嘆有啲事，係唔可以提早發生嘅。
阿Sa亦喺自己嘅社交平台post出同Wyman嘅合照，仲留言話對方係自己永遠都要感謝嘅人，又話唔唔知無咗Wyman嘅話，Twins會點。而除咗同Wyman聚舊外，阿Sa都有把握機會同容祖兒走圍去玩，仲影咗唔少靚相post上網派福利畀fans呀。
