周星馳同周杰倫今日喺IG忽然雙「周」互動，令不少網民好奇二人有咩新搞作，期待佢哋帶嚟驚喜，今日星爺率先喺IG貼出背影相，見佢飲住1961年法國貴價紅酒，聽住周杰倫歌曲《不愛我就拉倒》，星爺留言跟周杰倫講香港見，而周杰倫則回覆：「星爺，品味太屌了。」
其後周杰倫喺IG上載手拎啤牌嘅單人照，指星爺叫佢喺法國帶幾瓶紅酒返嚟，仲要佢去見一見《賭俠2之上海灘賭聖》法國賭神「皮亞卡箱（Pierre Cashon）」，當年《賭俠2》終極賭局講Pierre Cashon與「今晚打老虎」周星馳玩啤，賭遍天下無敵手，唯一一次就係賭輸畀星爺。
二人忽然搞笑互動，有人猜測周星馳將擔任周杰倫演唱會嘉賓，另有人認為「雙周」神之合體惹開拍新戲傳聞，其後周星馳經理人亦向媒體透露二人有合作機會：「在溝通中，但暫時不能透露詳情。」