隱形戰隊丨劉佩玥百變性感造型率先睇 與馬國明搞笑互動充滿粉紅氣泡

劉佩玥（Moon）喺TVB新劇飾演嘅Shadow雖然第1集未有出場，但劇集片頭片尾充斥著佢嘅型格靚靚特寫，故前晚（6 日）首播已引起熱議，女特務緊身裝更係焦點所在，噚晚（7 日）Shadow出場電力十足、秀髮飄逸，一嚟即戙腳兼掹槍指嚇飾演黑幫頭目嘅林偉，以溫柔聲線咬牙切齒謂：「啲貨喺邊？」眼見林偉不肯就範，Shadow 一個冷笑後即毫不猶豫向身旁嘅Ocean（馬國明飾）開槍，成功恐嚇林偉爆料，而佢與Ocean嘅警察身份亦真正曝光。

噚晚Shadow為Ocean掹玻璃一幕亦搞笑誘惑兼而有之。束起頭髮嘅Shadow先係風情萬種問 Ocean：「點呀？好緊張呀？」再邊撥頭髮邊向 Ocean 投以無辜眼神，其間又不忘送上肉嘴，呢一幕雖然充滿粉紅氣泡，拍攝現場卻充滿歡樂氣氛，Moon 受訪時透露與馬明由於已建立默契及信任，故拍攝時零尷尬，最辛苦反而是笑個不停：「我哋唔係『焗蟹』（排練忍笑），係直情笑咗出嚟。嗰場我相信所有工作人員冇一個係唔笑，馬明其實係冷面笑匠，佢唔需要做啲咩已經好好笑。」

Moon又指不介意飾演誘惑擔當：「因為同我本人愈唔似，愈有挑戰性，呢個係演戲過 癮嘅地方。」據知劇中常以臥底身份查案嘅 Moon，形象確是相當百變，除咗有行政人員、白恤衫睡衣 look、更有拜金女、模特兒及一樓一鳳Look，Moon指監製文偉鴻（Jazz）對其角色要求係「婀娜多姿」，事前Moon準備功夫係節食及做運動修線條：「Shadow係好亮麗嘅角色，所以我都要 Keep住最好狀態，除咗表面要靚、要精神，仲要好Fit。」

《隱形戰隊》噚晚更播出長達七分半鐘嘅大型場面，當中包含槍戰、追逐、飛車、閃避及爆玻璃等不同元素；由於拍攝時全部起用真槍，加上節奏緊湊明快，別具視覺及聽覺震撼之餘，亦讓網民看得熱血沸騰，大叫刺激。警匪激戰期間， 對Ocean 懷有介蒂嘅Madam Q（唐詩詠飾），多次猜疑對方「係人係鬼」，二人近乎冇對白嘅情況下，靠眼神及微表情交代「懷疑」、「猶豫」、「疑惑」等多種複雜情緒，加上同時兼顧開槍、閃避及走位，相當考演技。

馬明受訪時透露呢場大型動作場面，單係佢自己嘅部分已拍咗接近2日，監製 Jazz 全程喺現場緊貼指點，獲馬明大讚專業。談到整場戲最難部分，馬明笑指係要「keep住好型咁上子彈」，因為唔可以睇住隻手，而係要望住前面嗰個賊人，所以事前要係咁練，正式拍嗰take 仲要撞手神，馬明稱唔係吓吓得，要整得好瀟灑其實好嘥時間，馬明續指為此係咁 NG：「有 10 Take、8 Take，你哋睇好似好簡 單，其實一啲都唔容易，有時仲要跑緊，對眼又要望住，隻手又要換子彈，變咗同一時 間要兼顧好多嘢。」

《隱形戰隊》逢周一至五晚八點半翡翠台播映