連炎輝（Alan）為張國榮及梅艷芳好友，亦係陳玉蓮同廖安麗嘅第6期藝員訓練班同學，多年與不少圈中人不時敘舊，呢日連炎輝舉行生日宴，獲影視界前輩們雲集，場面墟冚又溫馨。
金漢、凌波、陳玉蓮、陳法蓉、邵美琪、黎瑞恩、廖安麗、江欣燕、羅蘭、鍾鎮濤、余安安、潘嘉德、陳復生、鄧萃雯、胡楓、盧敏儀、肥媽、林建明、姜大衛、馬海倫、陳敏兒及陳潔靈等資深藝人到場送上祝福，疫情後再見面，眾人一邊歎美食一邊小酌幾杯，眾人過咗開心嘅一晚。
連炎輝曾加入TVB藝訓班、其後轉投保險界逾35年，當年梅艷芳生前買嘅巨額保險都係佢一手包辦，陳法蓉亦有喺微博貼出當晚合照，首先恭喜壽星Alan生日快樂，「人好所以人緣好，好多前輩都來了，各方好友一起和你慶祝」，可見連炎輝人緣極好。
62歲陳玉蓮淡出演藝圈多年，甚少公開露面，只係間中相約昔日好友聚會，陳玉蓮氣質過人，喺合照中相當搶鏡，陳玉蓮近年致力做公益活動，參與內地慈善工作，佢曾組成義工隊一齊走遍西藏、雲南、四川等山區協助教育工作，而佢亦有助養多位內地孤兒。