邵氏影星凌波於60年代憑一曲《郊道》爆紅，於1967年憑《烽火萬里情》榮登金馬影后，凌波與丈夫金漢於1966年結婚，後來佢哋移居台灣自組電影公司，直到80年代淡出幕前，與丈夫金漢移民加拿大，近日資深傳媒人汪曼玲喺社交平台貼出合照，見凌波與金漢均年過80歲，精神不俗，更指二人不時打高爾夫球，體魄依然健康。
原來今年凌波與金漢回台灣過年，隨後到訪香港，因此佢哋相約喺粉嶺高爾夫球場見面，同場仲有三對圈中恩愛夫妻姜大衞與李琳琳、經理人陳淑芬與老公陳柳泉；姜大衞與李琳琳結婚49年，明年是50年金婚，而凌波與金漢結婚57年，還有3年就慶祝鑽石婚，娛樂圈恩愛夫妻每日似足情人節。
相中見83歲凌波清爽短髮造型，戴住太陽眼鏡、身穿藍紅色背心外套，打扮頗為年輕，老公金漢亦保養得宜，汪曼玲亦問過二人相處之道，88歲金漢坦言對離開一啲都唔害怕，但佢最牽掛、最放不下嘅人就係凌波，凌波亦覺得人生路上有一位老伴真係好重要，凡事有商有量，精神及生活上均互相依賴及有寄托，金漢與凌波喺球場上亦係最佳拍檔，幾乎天天打高爾夫球；凌波於曾2001年患上癌症，金漢一直在旁悉心照顧，金漢曾指凌波患病令佢更清楚意識到愛妻對自己嘅重要，凌波在手術後慢慢康復，恩愛更勝從前！
李琳琳與老公姜大衞明年踏入金婚，佢向汪曼玲透露兩公婆相處最重要係「互相忍讓」，由於佢同姜大衞性格比較強，未結婚前試過冷戰唔肯溝通而分手，直到佢哋婚後先知道包容好重要，而家佢哋就算有唔開心，過幾日就會唔忘記咗。