Gigi白色情人節推新歌《大開眼界》 A0心情冷眼看愛情苦澀

唔少有情人對白色情人節充滿甜蜜期盼，不過 炎明熹 就選擇喺3月14呢一日推出苦情歌《大開眼界》，以A0旁觀者身份唱出愛情苦澀，提醒世人勿為愛情無限退讓，最終失去自己，仲隨時會親手斷送呢段愛情。
 
雖然Gigi尚未踏入過愛情世界，不過依然表達出愛情中扎心嘅內心世界，Gigi仲話要歸功於作詞人曰云，佢話：「填詞人有同我講，講完我明白少少道理，睇完成個故事，認為唔可以太過於卑微，唔可以一味去付出，因為只要嗰個人鍾意你嘅話，係唔會要你咁樣做。」

 
Gigi又認為愛情中，可以同第一個遇上嘅人情定終生，係一件非常難得嘅事，所以佢覺得就如新歌歌名一樣，不妨先令自己大開眼界：「去睇下更加廣濶嘅世界，可能亦都係好事，唔會畀任何事物框住自己。」對選擇喺白色情人節推出慘情歌，Gigi就話喇：「因為愛情入面除咗有sweet嘅moment，亦都有令人痛心時刻，首歌係提醒大家唔好因為愛而迷失自己，太忍讓其實都會為另一半帶嚟壓力。」

只得17歲目前仍處求學階段嘅Gigi，雖然尚未遇到初戀，不過佢就想像到將來若遇上自己深愛嘅人時，會願意為對方作出妥協，不過若對方令自己一再放寬底線，佢就理性指係時候反省，諗清楚對方係咪否真正喜歡自己：「因為咁樣會覺得自己太過卑微，只係自己去付出，而唔係大家一齊去付出，如果佢係足夠愛我嘅話，咁改嘅應該係佢而唔係我。」


Gigi明白從未真正經歷愛情，所以難以真正理解當中嘅感覺觸發情緒，不過亦笑言自己喺感情事上抱佛系心態：「唔抗拒戀愛，因為可以體驗吓唔同嘅情緒，亦為人生加一啲故事，但我比較佛系，拍拖呢樣嘢可以唔使咁急住，佢嚟就接住佢，佢唔嚟都冇所謂。」


Gigi出道至今已推出多首歌曲，一眾Gi炎粉都相當關心Gigi何時會推出正式專輯？對此佢就話公司將會有安排，仲叫一眾Gi炎粉耐心靜候呀。