李克勤 將再次與 香港管弦樂團 合作；事隔6年之後，5月中終於再次踏紅館舞台同歌迷見面。克勤相隔20年，再同港樂合作演出「弦續李克勤‧港樂演唱會」。

早前克勤同港樂近60人嘅大樂隊綵排同拍攝海報，因為克勤希望同樂隊成員一齊拍攝留念，所以齊齊移師演奏廳取景，仲由朝影到傍晚。20年前雙方合作過紅館演唱會，到今日再次相逢，所以海報設計上亦已濃厚友情角度出發，用兒時玩具帶出由細玩到大嘅溫馨同歡樂。

克勤5月中將會再次登上紅館舞台，仲會再次同港樂合作演出

海報上見到大家都正裝打扮，但係就童心未泯拎住玩具樂器，大家嘅童真有趣神態，相信已經感受到當中嘅繽紛歡樂氣氛喇。

克勤笑說：「影海報當然心情極度興奮，好大陣仗呀今次，人多勢眾覺得好熱鬧、好開心，回想返對上一次合作，已經係20年前。當年我只係7、8歲啦，哈哈哈。嗰種感覺係你識個朋友二十年，再一次合作，大家無論係感情、功力上都有升華。今次張海報主要係想表達呢個騷，主要係要話俾大家知，音樂可以有好嚴肅一面，亦可以好輕鬆快樂， 個騷好認真做亦可以好好玩。」

拍攝時大家仲都手持玩貝，希望大家感受到童真嘅歡樂
克勤又話今次拍攝係由老婆 盧淑儀 負責揀服裝：「我拆開個衫袋，以為自己帶少咗恤衫，點知打俾老婆，佢就話『你識咩，總之入面真空啦，乜都唔駛著係咁先靚』老婆話乜就乜啦。覺得涼浸浸咁。影嗰陣仲有工作人員提我話『李生你走光呀』！麻甩佬都有人提走光，我覺得好好笑。」

克勤又話疫情之後，相信每一個對音樂有憧憬嘅歌手都等到頸長，好渴望再一次喺紅館做騷：「今次希望歌迷觀眾可以多啲參與，所以其實已經喺社交媒體問歌迷想聽咩歌，大家同我一齊揀，我哋會以最勁嘅管弦樂團結合音樂重新編排，有最正嘅視覺效果，帶俾大家震憾嘅音樂盛宴。我哋已經開始籌備好多新元素擺喺個騷入面，呢排日日開會為個騷拍攝片都好忙，自己操練就都係咁上下，我不嬲都大量運動，唔係打波就踢波，所以都唔駛點狂操。」

至於演唱會有冇特別嘉賓，克勤就笑道：「有！其中一晚仲會有一個來頭好猛嘅嘉賓，就睇大家買飛買唔買得中啦。」

李克勤相隔6年再開紅館騷，今年5月舉行，佢與香港管弦樂團相隔20年後再合作，呢日聯同60位管弦樂團團員為演唱會拍攝海報，而克勤一身造型係由太太盧淑儀幫忙準備。

克勤笑言著呢件戰衣冇得著底衫：「麻甩佬都真空上陣，係好唔習慣，佢話係咁著先靚，咁OK啦！」克勤今次開騷希望同20年前嘅合作好唔同，希望大家喺音樂及感情上各方面昇華，希望加多啲20年前冇嘅元素，想觀眾可以參與多啲，期待擦出不一樣嘅火花。