廉政狙擊丨羅霖床戲被讚皮膚白滑 三位男主角拍掉落海戲浸足一晚

有美魔女之稱嘅羅霖，喺劇集《廉政狙擊》入面為咗令飾演佢老公嘅黃智賢可以順利投得地皮，所以不惜同飾演發展局企業發展總監嘅蔡康年發生關係，雖然場床戲只有半分鐘，但觀眾都讚佢飾演嘅闊太嗰份自信同氣場都恰到好處，但最令大家驚喜嘅，係58歲嘅羅霖無論個樣定身上嘅皮膚都係相當白滑！

羅霖接受訪問時，直言呢場戲係佢拍劇以嚟最大膽演出，睇到劇本時覺得相當意外，所以事前都有同導演傾：「導演覺得劇情係順理成章，所以照拍，導演都好好，有為我清場，佢亦都拍得有美感。因為劇情係講卓生係完全知道同埋同意呢一件事，所以卓家嘅三觀係同一般人好唔同，我睇晒亦研究過郭明暉呢個角色，知道佢可以為咗屋企犧牲自己。」

對於被觀眾讚皮膚白滑，羅霖表示自己一年四季都好着重身體皮膚保養，仲話拍嗰陣有做足打底功夫：「我有着泳衣打底，亦都貼晒胸貼，所以唔驚走光。」佢仲話囝囝都有追呢套劇，覺得係劇情需要，所以好了解。講到美胸心得？羅霖笑言其實冇咩乜特別，佢話自己會做唔同嘅運動兼顧全個身體，有啲運動嘅動作都可以幫助到少少美胸。

另外14號晚播出嘅一集，仲有三位男主角 吳卓羲 、王浩信 同 黃宗澤 連人帶貨車跌落海一幕，劇組今日公開幕後拍攝花絮，為增加真實感，劇組先買入一架真密斗貨車，再拆除內籠，以吊車吊到拍攝現場，此外又借咗潛水設備同電影級別潛水攝影機，以拍出電影感。

有份參與拍攝嘅黃宗澤，透露單係呢個「水浸貨斗」嘅環節就已經拍咗成晚，連同相關場口、其他文戲同打戲，前前後後總共拍咗幾日。佢坦言呢場戲相當考驗體力：「都差不多成晚浸咗落水， 又有一定危險性啦，但其實全程有潛水員睇住，佢有咩事會救我哋。因為個貨斗會慢慢浸落水，我哋又要慢慢畀水浸過先有嗰個緊張性，成件事都真係比較複雜，好彩我哋三個都識游水，咪當喺個泳池度玩一晚咯。」

《廉政狙擊》星期一至五 21:30 翡翠台