今年4月1日係哥哥張國榮逝世20周年，為紀念呢位樂壇巨星，無綫將會連續三個周末推出一連串以《永遠寵愛張國榮》為主題嘅特備節目，包括電影、劇集、音樂節目及綜藝特備節目等。
《永遠寵愛張國榮》系列嘅頭炮節目，為同名嘅特備綜藝節目，當中除咗會播出哥哥多首經典金曲《由零開始》、《風繼續吹》、《儂本多情》、《Monica》、《為你鍾情》及《當年情》等精華片段外，仲有哥哥以往喺無綫大騷嘅精彩演出，相當珍貴。
節目入面仲會有哥哥昔日接受無綫訪問嘅精彩節錄，另外又請嚟哥哥嘅好友、拍檔同前輩，包括鍾景輝、許冠傑、譚詠麟及李麗珍等分享同哥哥昔日嘅點滴，同對哥哥嘅看法。
除咗音樂作品外，哥哥嘅經典電影同劇集作品亦都係多不勝數，所以由3月18號起，逢星期六00:00 及 星期日 00:05，將一連五星期播出經過數碼修復嘅劇集《儂本多情》。
故事講述商天娥飾演嘅莫笑儂，在各種原因下嫁咗畀張國榮飾演嘅詹時雨，但因為當中夾雜咗無數誤會，令笑儂誤會時雨利用自己嚟進行連串復仇大計，最終更悲劇收場。當年商天娥望住酒杯一面死灰個樣子，同哥哥焦急趕嚟嘅神態，都令觀眾過目難忘。想重溫哥哥當年精湛嘅演技同佢風流倜儻嘅你就萬勿錯過喇！
除咗經典劇集，翡翠台喺4月2號 22:00 將會播出數碼修復嘅音樂電影《永遠寵愛張國榮：日落巴黎》嘅高清版，無論聲畫都係經本台專業團隊細緻修復同提升，希望以最高質量嘅視聽效果，同觀眾一齊懷緬哥哥昔日風采，而4K版就會喺myTV Super 播出。
另外，J2 亦會喺3月19同26號 21:00 先後播出電影《胭脂扣》同《阿飛正傳》，而4月1嘅22:30至23:15，翡翠台將會播出《勁歌金曲張國榮特輯》。
特備綜藝節目《永遠寵愛張國榮》由3月18日起 一連兩個星期六 22:30 至 23:00 翡翠台
