新劇《非常檢控觀》嘅各個角色近日分別現身試造型，除咗日前有份演出嘅 馬德鐘 等藝人之外，呢日扮演一名拍賣行老闆嘅 陳庭欣 亦都以一身專業形象出現，Toby仲話當中一場拍賣戲份令自己非常期待呀。

會喺呢場戲擔任拍賣官嘅佢話，就話要好好研究一名專業拍賣官應該有咩神態，仲話要好好練習吓喎。而阿峰一身貴公子打扮，身為法律系學生嘅角色，仲非常不可一世，佢就話同自己性格太大反差，所以難度都唔細咁話呀。

阿峰仲話要模仿真係讀法律系嘅前女友講話理性嘅說方式，而同 戴祖儀 份屬同學之餘仲會一齊喺其中一個單元再合作演出呀。

戴祖儀呢日同唱片公司小師妹羅毓儀出席中學聯校運動競技日，同學生們一齊玩電競賽車，講起做運動，羅毓儀競話自己比較文靜，亦冇咩運動細胞，相反戴祖儀就自稱喺運動達人，咩運動都會涉獵一下，仲話諗返以前嘅聯校運動會真係一個好美好嘅回憶，因為呢個係當時唯一嘅機會可以睇到其他學校嘅男仔呀。

之前喺節目入面合唱過，令戴祖儀同羅毓儀都話好想再繼前緣，組合組合一齊唱歌，不過呢個組合幾時組得成就係未知之數，但新歌呢佢哋嚟緊都會各自推出呀，羅毓儀仲話好開心第一首歌公司願意畀佢用自己創作嘅歌曲，佢仲預告首歌係日本動漫風㗎！而戴祖儀就話今年會嘗試自己作曲，仲話因為自己上年喺音樂上靜咗少少，所以今年會努力啲呀。

講到啱啱同完麥美恩去韓國拍攝旅遊節目《請一日假去旅行》，祖儀就話呢個trip勁難忘，最難忘嘅係要一日食四餐呀！